CM KCR : నవంబర్ 8 నుంచి పోడు సాగుదారుల నుంచి దరఖాస్తులు: కేసీఆర్‌

పోడు భూముల సమస్య పరిష్కారం కోసం వచ్చే నెల ఎనిమిదో తేదీ నుంచి నెలరోజుల పాటు దరఖాస్తులు స్వీకరించాలని రాష్ట్ర ప్రభుత్వం నిర్ణయించింది. జిల్లా కలెక్టర్లు, అటవీ, గిరిజన సంక్షేమ, పోలీసు అధికారులతో జరిగిన ఉన్నతస్థాయి సమావేశంలో ముఖ్యమంత్రి కేసీఆర్ ఈ మేరకు నిర్ణయం తీసుకున్నారు. పోడు భూముల సమస్యను పరిష్కరిస్తూనే, అటవీ భూములను రక్షిస్తూ వాటిని దట్టమైన అడవులుగా పునరుజ్జీవింప చేయాలన్న కేసీఆర్... ఈ అంశాలపై జిల్లాల్లో అఖిలపక్ష సమావేశాలు నిర్వహించాలని చెప్పారు. అడవి మీద ఆధారపడి బతికే అమాయకులైన గిరిజనులకు మేలు చేయడంతో పాటు అడవులను నాశనం చేసే శక్తులను గుర్తించి కఠిన చర్యలు తీసుకోవాలని స్పష్టం చేశారు. గంజాయి సాగు చేసే రైతులకు రైతుబంధు, రైతుబీమాతో పాటు విద్యుత్ సౌకర్యం నిలిపివేయాలన్న సీఎం... ఆర్ఓఎఫ్ఆర్ పట్టారద్దుతో పాటు చట్టపరమైన చర్యలు ఉంటాయని హెచ్చరించారు.

పోడుభూముల సమస్య పరిష్కారం, అటవీ రక్షణ- పునరుజ్జీవం, హరితహారం అంశాలపై ప్రగతిభవన్​లో ఉన్నతస్థాయి సమావేశం జరిగింది. సంబంధిత శాఖల మంత్రులు, అన్ని జిల్లాల కలెక్టర్లు, అటవీ, గిరిజన సంక్షేమం, పోలీస్, పంచాయతీ రాజ్ శాఖల ఉన్నతాధికారులతో ముఖ్యమంత్రి కల్వకుంట్ల చంద్రశేఖర్ రావు సమీక్ష నిర్వహించారు. పోడు భూముల సమస్యను పరిష్కరిస్తూనే, అటవీ భూములను రక్షిస్తూ వాటిని దట్టమైన అడవులుగా పునరుజ్జీవింపజేయాలని సీఎం అధికారులను ఆదేశించారు. అడవిపై ఆధారపడి బతికే అమాయకులైన గిరిజనులకు మేలు చేయడం, అడవులను నాశనం చేసే శక్తులను గుర్తించి వాళ్లపై కఠినమైన చర్యలు తీసుకోవాలని అధికారులకు స్పష్టం చేశారు. ప్రభుత్వ సంక్షేమ, అభివృద్ధి కార్యక్రమాల అమల్లో ఆశించిన విధంగా పని చేస్తున్న కలెక్టర్లు అటవీ భూముల రక్షణలోనూ కీలక భూమిక పోషించాలని కేసీఆర్ తెలిపారు. అడవుల రక్షణలో అన్ని స్థాయిల్లోని సంబంధిత శాఖల అధికారులతో పాటు, గ్రామ సర్పంచులు, ఇతర ప్రజాప్రతినిధులను భాగస్వాములను చేయాలని సూచించారు.

నెల రోజుల పాటు దరఖాస్తులు..

పోడు సాగు చేసుకుంటున్న గిరిజనులు, ఇతరుల నుంచి నవంబర్ 8 నుంచి డిసెంబర్ 8 వరకు దరఖాస్తులు స్వీకరించాలని ముఖ్యమంత్రి ఆదేశించారు. ఆలోగా వివిధ స్థాయిల్లో సన్నాహక సమావేశాలు ఏర్పాటు చేయాలని, ఆర్వోఎఫ్ఆర్ చట్టం ప్రకారం గ్రామ కమిటీలు నియమించాలని తెలిపారు. రెండు, మూడు గ్రామాలకొక నోడల్ అధికారిని నియమించాలని... సబ్ డివిజన్ స్థాయిలో ఆర్డీఓ, జిల్లా స్థాయిలో కలెక్టర్ ప్రక్రియను పర్యవేక్షించాలని చెప్పారు. భద్రాద్రి కొత్తగూడెం, కుమురంభీం ఆసిఫాబాద్, మహబూబాబాద్, ములుగు, ఆదిలాబాద్, జయశంకర్ భూపాలపల్లి, కామారెడ్డి, ఖమ్మం, నిర్మల్, వరంగల్, నల్గొండ, నిజామాబాద్ వంటి 12 జిల్లాల్లోనే 87 శాతం పోడు భూముల ఆక్రమణ ఉందని సీఎం కేసీఆర్ అన్నారు.

అడవుల రక్షణను బాధ్యతగా ప్రోత్సహించాలి..

పోడు భూముల సమస్య పరిష్కారం, అటవీ భూముల రక్షణ అంశాలపై అన్ని జిల్లాల్లో అఖిలపక్ష సమావేశాలను నిర్వహించాలని కలెక్టర్లను ముఖ్యమంత్రి ఆదేశించారు. ఇప్పటి వరకు పోడు సాగు చేసుకుంటున్న గిరిజనులు, తదితరులకు ఆర్వోఎఫ్ఆర్ హక్కులు కల్పించడం, ఆ తర్వాత అటవీ భూమి ఇంచు కూడా ఆక్రమణకు గురికారాదన్న విషయంలో అఖిలపక్ష నేతల నుంచి ఏకాభిప్రాయం తీసుకోవాలని చెప్పారు. ఎంపీలు, ఎమ్మెల్యేలు, జడ్పీ ఛైర్మన్లు, ఎంపీపీలు, జడ్పీటీసీలు తదితర ప్రజాప్రతినిధులతో సమావేశాలు నిర్వహించాలని అన్నారు. గ్రామాల్లో సర్పంచులు, ఇతర ప్రజాప్రతినిధులు అడవుల రక్షణను ఒక బాధ్యతగా తీసుకునేలా ప్రోత్సహించాలని సీఎం సూచించారు. అన్ని రంగాల్లో అభివృద్ధి చెందినప్పటికీ ప్రజలు బతకలేని పరిస్థితి ఉంటే లాభం లేదని ఆవేదన వ్యక్తం చేసిన ముఖ్యమంత్రి... అడవులను రక్షించుకుంటేనే భవిష్యత్తు తరాలకు మేలు చేసిన వారం అవుతామని పేర్కొన్నారు.

అడవులను నాశనం చేసేవారిపై కఠిన చర్యలు..

దట్టంగా ఉన్న అడవులను రక్షించుకోవడం, అటవీ భూములను గుర్తించి, వాటిని అడవులుగా పునరుజ్జీవింపజేయడం, ఆక్రమణలు లేకుండా చేయడం, ఉద్దేశపూర్వకంగా అడవులను నాశనం చేసే వారిపై కఠిన చర్యలు తీసుకోవడం ప్రాధాన్యతగా తగిన కార్యాచరణ రూపొందించుకోవాలని అధికారులను ఆదేశించారు. అమాయక గిరిజనులు అడవిని కంటికి రెప్పలా కాపాడుకుంటారన్న సీఎం... బయటి నుంచి వచ్చే శక్తులే అడవిని నాశనం చేస్తున్నాయని అన్నారు. గోండు, కోలం, కోయ వంటి గిరిజన తెగల అడవి బిడ్డలు అడవికి నష్టం చేయరని అభిప్రాయపడ్డారు. బయటి నుంచి వచ్చే శక్తులు అడవులను ధ్వంసం చేయకుండా కట్టడి చేయాలని ముఖ్యమంత్రి ఆదేశించారు. అవసరమైతే పీడీ చట్టం కింద కేసులు నమోదు చేయాలని స్పష్టం చేశారు. అడవులను కాపాడుకునే అమాయకులు ఎవరు? అడవులను నాశనం చేయాలనుకునే వారు ఎవరన్నది గుర్తించడం ముఖ్యమని కేసీఆర్ అన్నారు.

అడవి మధ్యలో సాగు చేస్తే..

అడవి లోపల పోడు సాగు చేస్తున్న గిరిజనులకు సమీపంలోని ప్రభుత్వ భూములను సాగుకు కేటాయించాలని, ప్రభుత్వ భూములు లేని పక్షంలో అటవీ భూముల అంచున సాగు భూమిని కేటాయించి, నీరు, విద్యుత్, నివాస సదుపాయాలు కల్పించాలని తెలిపారు. అటవీ భూములకు శాశ్వత హద్దులు గుర్తించి ప్రొటెక్షన్ ట్రెంచ్ ఏర్పాటు చేయాలన్న సీఎం... ట్రెంచ్​పై గచ్చకాయ ప్లాంటేషన్ చేపట్టాలని సూచించారు. ట్రెంచ్ ఏర్పాటుకు అటవీశాఖ నిధులతో పాటు ఉపాధి హామీ పథకం నిధులను ఉపయోగించుకోవాలని చెప్పారు.

గంజాయి సాగు చేస్తే పట్టా రద్దు..

సామాజిక అడవుల పెంపకంలో భాగంగా ఎన్ని కోట్ల మొక్కలు నాటినా ఒక అడవితో సమానం కాదన్న కేసీఆర్... పది ఎకరాల అడవి కొన్ని లక్షల మొక్కలతో సమానమని తెలిపారు. గజ్వేల్ తరహాలో అన్ని జిల్లాల్లో అడవుల పునరుజ్జీవానికి ప్రత్యేక శ్రద్ధ తీసుకోవాలని చెప్పారు. అడవి లేని జిల్లాల్లో ఖాళీగా ఉన్న అటవీ శాఖ భూముల్లో అడవులను అభివృద్ధి చేయాలని ముఖ్యమంత్రి తెలిపారు. గ్రామాల్లో పల్లె ప్రకృతి వనాల అభివృద్ధి మంచి ఆలోచన అని అధికారులను అభినందించారు. గంజాయి సాగు చేసే రైతులకు రైతుబంధు, రైతుబీమా, విద్యుత్ సౌకర్యం నిలిపివేసి, వారిని అరెస్ట్ చేసి జైలుకు పంపేలా చర్యలు తీసుకోవాలని సీఎం అధికారులను ఆదేశించారు. ఆర్వోఎఫ్ఆర్ భూముల్లో గంజాయి సాగు చేస్తే పట్టా రద్దు చేయడంతో పాటు చట్టపరమైన చర్యలు కూడా తీసుకోవాలని స్పష్టం చేశారు. గుడుంబా తయారీని పూర్తిస్థాయిలో అరికట్టి తయారీదారులకు ఉపాధి, పునరావాసం కల్పించేలా చర్యలు తీసుకోవాలని ముఖ్యమంత్రి కేసీఆర్ అధికారులను ఆదేశించారు.

ఇదీ చదవండి: