‘పిల్లలకు ఇవ్వగలిగే ఆస్తి చదువే. పోటీ ప్రపంచంలో వారి కాళ్లపై వాళ్లు నిలబడాలి. అందుకే వారికి మంచి జరగాలని, పేదింటి పిల్లలు చదువనే అస్త్రంతో పేదరికాన్ని దాటాలని కోరుకుంటున్నా’ అని ఆంధ్రప్రదేశ్ ముఖ్యమంత్రి జగన్‌మోహన్‌రెడ్డి పేర్కొన్నారు. ఆంధ్రప్రదేశ్లోని తూర్పుగోదావరి జిల్లా పి.గన్నవరం మండలంలోని జిల్లా పరిషత్తు ఉన్నత పాఠశాలలో సోమవారం ‘మన బడి నాడు-నేడు’ మొదటి దశ పనులను విద్యార్థులకు అంకితం ఇవ్వడం, రెండోదశ పనులకు శంకు స్థాపన, జగనన్న విద్యా కానుక ప్రారంభ కార్యక్రమాల్లో పాల్గొన్నారు.
అనంతరం బహిరంగ సభలో సీఎం మాట్లాడుతూ.. ‘రాష్ట్రంలో విద్యా పథకాలకు గత రెండేళ్లలో రూ.32,714 కోట్లు ఖర్చు చేశాం. ప్రతి ఒక్కరూ చదువుకోవాలి. డిగ్రీ, వృత్తి విద్యను హక్కుగా చదువుకునేలా విద్యా వ్యవస్థను మారుస్తున్నాం. ప్రభుత్వ పాఠశాలలు, వసతి గృహాల రూపురేఖలను మార్చి.. కార్పొరేట్‌ స్కూళ్లకు దీటుగా తీర్చిదిద్దుతున్నాం. విద్యా కానుకలో ప్రతి విద్యార్థికి మంచి స్కూలు బ్యాగు, పుస్తకాలు, డిక్షనరీ ఇస్తున్నాం. రెండేళ్లలో విద్యా కానుకకు రూ.1,380 కోట్లు ఖర్చు చేశాం. ఈ ఏడాది 42.32 లక్షల మందికి రూ.731 కోట్లతో కిట్లు ఇస్తున్నాం. గతేడాది లోపాలను సవరించి నాణ్యతతో కూడిన వస్తువులు ఇస్తున్నాం. నాడు-నేడు తొలిదశ 15,700 పాఠశాలల్లో పూర్తిచేసి.. రెండో దశకు శ్రీకారం చుట్టాం. రూ.16 వేల కోట్లతో రాష్ట్ర వ్యాప్తంగా పాఠశాలల రూపురేఖలు మారబోతున్నాయి.
ప్రతి పాఠశాలలో విద్యార్థులకు ఇంగ్లిషు లాంగ్వేజ్‌ ల్యాబ్‌ ఏర్పాటు చేస్తాం. సినిమాలు, గేమ్స్‌ ద్వారా ఆంగ్లంపై పట్టు పెంచేలా ల్యాబ్‌లు పెడతాం. రెండేళ్ల కార్యక్రమాలతో పదో తరగతిలోపు పిల్లలు గత ప్రభుత్వ హయాంలో 2018-19లో ప్రభుత్వ, ప్రైవేటు స్కూళ్లలో కలిపి 70.43 లక్షల మంది ఉంటే... ఆ సంఖ్య ఇప్పుడు కొవిడ్‌ ఉన్నా 73.05 లక్షలకు పెరిగింది. ప్రభుత్వ పాఠశాలల్లోనే అప్పట్లో 37.20 లక్షల మంది చదివితే.. ఇప్పుడా సంఖ్య 43.43 లక్షల మందికి చేరింది. డబ్ల్యూహెచ్‌వో, ఐసీఎంఆర్‌ మార్గదర్శకాలతో కొవిడ్‌ నిబంధనలు పాటిస్తూ పాఠశాలలు తెరవాలని ఆదేశించాం. సచివాలయం యూనిట్‌గా 10 శాతం కంటే పాజిటివిటీ రేటు తక్కువగా ఉన్నచోటే బడి తెరవాలి. ఒక్కో తరగతి గదిలో 20 మందికి మించి ఉండకూదని ఆదేశాలిచ్చాం. ఎక్కువ మంది ఉంటే రోజు విడిచి రోజు తరగతులు నిర్వహించాలి. ఉపాధ్యాయులందరికీ వ్యాక్సిన్‌ వేయించాం’ అని జగన్ తెలిపారు.
అక్షర సేద్యమిది: మంత్రి సురేష్‌
విద్యాశాఖ మంత్రి ఆదిమూలపు సురేష్‌ మాట్లాడుతూ.. గత పాలకులు పాఠశాలల్లో మౌలిక వసతులు విస్మరించి ప్రైవేటు విద్యను ప్రోత్సహించారని విమర్శించారు. సీఎం జగన్ అక్షర సేద్యం చేస్తూ ప్రభుత్వ విద్యాలయాల రూపునే మార్చారని అన్నారు. పాఠశాల విద్య ప్రిన్సిపల్‌ సెక్రటరీ రాజశేఖర్‌ మాట్లాడుతూ.. పాఠశాల విద్యాశాఖ చరిత్రలో ఎన్నడూ ఇంత అభివృద్ధి జరగలేదన్నారు.
కార్యక్రమంలో భవిత కేంద్రాన్ని, నాడు-నేడు పనులను సీఎం పరిశీలించారు. విద్యార్థులు, ఉపాధ్యాయులతో మాట్లాడారు. నాడు-నేడు పనులకు వినియోగిస్తున్న సామగ్రి, విద్యా కానుక కిట్ల నాణ్యత పరిశీలించారు. వార్షిక విద్యా ప్రణాళిక పుస్తకాన్ని ఆవిష్కరించారు. నాడు- నేడు కార్యక్రమంలో ప్రతిభ చూపిన ప్రధానోపాధ్యాయులు, ఇంజినీరింగ్‌ సిబ్బందికి అవార్డులు అందించారు. ఉపముఖ్యమంత్రి ధర్మాన కృష్ణదాస్‌, మంత్రులు కన్నబాబు, విశ్వరూప్‌, వేణుగోపాలకృష్ణ, ఎంపీలు అనురాధ, మార్గాని భరత్‌, మాధవి, రాజ్యసభ సభ్యుడు పిల్లి సుభాష్‌చంద్రబోస్‌, కలెక్టర్‌ సి.హరికిరణ్‌ తదితరులు పాల్గొన్నారు.
పాఠశాల రూపు మారింది
‘మా నాన్న హెచ్‌ఎం. నేను ప్రభుత్వ పాఠశాలలో చదువుతున్నా. రెండో తరగతి చదువుతున్నప్పుడు నాకు 23 మంది స్నేహితులుంటే.. ఇప్పుడు 88 మంది ఉన్నారు. పాఠశాలలో చేరే వారు రోజురోజుకూ పెరుగుతున్నారు. ఇందుకు పథకాలే కారణం. గతంలో మరుగుదొడ్ల ఆవరణ అధ్వానంగా ఉంటే ఇప్పుడు అందంగా మార్చారు’.
- శ్రీప్రణవి, ఐదో తరగతి, మొగలికుదురు
ఆడపిల్లలకు దిశతో రక్ష
‘సీఎం జగన్ మావయ్య ఆడపిల్లల రక్షణ కోసం దిశ యాప్‌ తెచ్చారు. పాఠశాల రూపురేఖలే మార్చారు. జగనన్న విద్యాకానుక ద్వారా స్కూలు బ్యాగు, పుస్తకాలు, స్టడీ మెటీరియల్‌ అందించారు. మా నాన్న టైలర్‌, అమ్మ గృహిణి.. రాష్ట్ర ప్రభుత్వ పథకాలతో ఇద్దరూ లబ్ధిపొందారు’
- సాయిశరణ్య, పదోతరగతి జడ్పీ ఉన్నత పాఠశాల, పి.గన్నవరం