పిల్లలకు మనం ఇవ్వగలిగే ఒకే ఒక్క ఆస్తి చదువే: సీఎం జగన్​

పిల్లలకు మనం ఇవ్వగలిగే ఒకే ఒక్క ఆస్తి చదువేనని ఏపీ ముఖ్యమంత్రి జగన్​ అన్నారు. తాడేపల్లిలోని క్యాంపు కార్యాలయంలో జగనన్న విద్యాదీవెన పథకాన్ని ఆయన ప్రారంభించారు. ఒక్క పైసా కూడా బకాయిలు లేకుండా ఫీజు రీయింబర్స్​మెంట్​ ఇస్తామని సీఎం తెలిపారు. కళాశాలల్లో సదుపాయాలు లేకపోతే 1902కు ఫోన్​ చేయాలని తల్లులకు ముఖ్యమంత్రి సూచించారు.

మంచి చదువుతోనే పేదల బతుకులు మారతాయని ఆంధ్రప్రదేశ్​ ముఖ్యమంత్రి జగన్​ అన్నారు. తాడేపల్లిలోని క్యాంపు కార్యాలయంలో జగనన్న విద్యా దీవెన పథకం ప్రారంభించిన ఆయన.. వీడియో కాన్ఫరెన్స్‌లో కలెక్టర్లు, విద్యార్థుల తల్లులతో మాట్లాడారు. విద్యాదీవెనలో భాగంగా 2 పథకాలు తీసుకొచ్చామన్న సీఎం.. విద్యార్థులకు బోర్డింగ్​, లాడ్జింగ్​, పూర్తి రీయింబర్స్​మెంట్​ ఇస్తామని తెలిపారు.

పిల్లలకు మనం ఇవ్వగలిగే ఆస్తి.. ఒక్క చదువేనన్న సీఎం.. మార్చి 31 వరకు ఉన్న పూర్తి బకాయిలను చెల్లిస్తామని పేర్కొన్నారు. 2018 – 19 లో గత ప్రభుత్వం పెట్టిన రూ.1880 కోట్లు, ఈ ఏడాదికి సంబంధించి ఒక్క పైసా కూడా బకాయి లేకుండా ఇస్తామని స్పష్టం చేశారు. 2020 – 21లోనూ ప్రతి త్రైమాసికం తర్వాత తల్లుల ఖాతాలో డబ్బులు వేస్తామని సీఎం జగన్​ వెల్లడించారు. కళాశాలల్లో సదుపాయాలు లేకపోతే 1902కు తల్లులు ఫోన్​ చేయవచ్చని ముఖ్యమంత్రి తెలిపారు.