CEO on mlc elections counting : రాష్ట్రంలోని 5 ఉమ్మడి జిల్లాల్లో స్థానిక సంస్థల ఎమ్మెల్సీ ఎన్నికల ఓట్ల లెక్కింపు... రేపు ఉదయం ప్రారంభం కానుంది. ఉమ్మడి ఆదిలాబాద్, మెదక్, నల్గొండ, ఖమ్మం జిల్లాల్లో ఒక్కోస్థానానికి... కరీంనగర్ జిల్లాలో రెండు ఎమ్మెల్సీ స్థానాలకు ఎన్నికలు జరిగాయి. ఓట్ల లెక్కింపు కోసం అన్ని ఏర్పాట్లు పూర్తి చేసినట్లు రాష్ట్ర ఎన్నికల ప్రధానాధికారి శశాంక్ గోయల్ తెలిపారు. ఆదిలాబాద్లో ఆరు, కరీంనగర్లో 9, మిగతా చోట్ల ఐదు టేబుళ్లపై లెక్కింపు జరుగుతుందని పేర్కొన్నారు. మొదట 25 చొప్పున కట్టలుగా కట్టి ఆ తర్వాత డీటెయిల్డ్ లెక్కింపు చేపడతారని వివరించారు. మొదటి ప్రాధాన్యత ఓట్లను మొదట లెక్కిస్తారని... లెక్కింపు ఏర్పాట్లపై వీడియో కాన్ఫరెన్స్ ద్వారా కలెక్టర్లతో సమీక్షించినట్లు వెల్లడించారు.
ర్యాలీలకు అనుమతి లేదు..
లెక్కింపు సందర్భంగా ప్రతి ఒక్కరూ కొవిడ్ నిబంధనలు కచ్చితంగా పాటించాలని స్పష్టం చేశారు. కౌంటింగ్ ఏజెంట్లు రెండు డోసుల వ్యాక్సినేషన్ సర్టిఫికెట్ గాని.. ఆర్టీపీసీఆర్ టెస్ట్ రిపోర్ట్ చూపాలని పేర్కొన్నారు. ఫలితాల తర్వార ఎలాంటి ర్యాలీలకు అనుమతి లేదని... గెలిచిన అభ్యర్థితో పాటు ఇద్దరు మాత్రమే ధ్రువీకరణ పత్రం తీసుకునేందుకు వెళ్లాలని సీఈవో స్పష్టం చేశారు.
మెదక్లో 4 టేబుళ్లు
మెదక్ ప్రభుత్వ బాలుర జూనియర్ కళాశాలలో.. ఓట్ల లెక్కింపునకు అన్ని ఏర్పాట్లు పూర్తి చేశామని జిల్లా ఎన్నికల అధికారి, కలెక్టర్ హరీశ్ తెలిపారు. ఉదయం 8 గంటలకు ఓట్ల లెక్కింపు ప్రారంభమవుతుందని.. ఓట్ల లెక్కింపుకు 4 టేబుళ్లు ఏర్పాటు చేస్తున్నామని ఆయన తెలిపారు. వాలిడ్ ఓట్లలో సగం కన్నా ఒకటి ఎక్కువ వచ్చిన అభ్యర్థిని విజేతగా పరిగణిస్తారని.. ఒక వేళ అన్ని ప్రాధాన్యత ఓట్లు రాకపోతే తక్కువ ప్రాధాన్యత ఓట్లు వచ్చిన మూడో అభ్యర్థిని ఎలిమినేట్ చేస్తామన్నారు. అతనికి రెండో ప్రాధాన్యతగా వచ్చిన ఓట్లను.. ఇరువురు అభ్యర్థులకు కలిపి లెక్కించి.. విజేత అభ్యర్థిని ప్రకటించి ధ్రువపత్రం అందజేస్తామని ఆయన వెల్లడించారు.