గాంధీ ఆస్పత్రిని కేంద్రమంత్రి కిషన్ రెడ్డి సందర్శించారు. ఆస్పత్రిలోని సౌకర్యాలను పరిశీలించిన కిషన్ రెడ్డి... ఆక్సిజన్ ప్లాంట్ పనితీరును అధికారులను అడిగి తెలుసుకున్నారు. కిషన్ రెడ్డిని ఆస్పత్రి సూపరింటెండెంట్ రాజారావు సన్మానించారు.
"ఇప్పటివరకు గాంధీ ఆస్పత్రిలో పది సార్లు పర్యటించా. సెకండ్ వేవ్లో ఆక్సిజన్ కొరత బాగా వెంటాడింది. ఈ నేపథ్యంలో ఆస్పత్రిలో ఆక్సిజన్ కొరత లేకుండా సిద్ధం చేసుకున్నాం. పీఎం కేర్ కింద దేశంలో 1,222 ఆక్సిజన్ ప్లాంట్లు ఏర్పాటు చేశారు. అందులో 8 ఆక్సిజన్ యూనిట్లు గాంధీలో అందుబాటులో ఉన్నాయి. ఆస్పత్రిలో మరో 6 ఆక్సిజన్ యూనిట్లు ఏర్పాటు చేస్తున్నాం. రాష్ట్రంలో 41 చోట్ల ఆక్సిజన్ ప్లాంట్ల ఏర్పాటు ప్రక్రియ జరుగుతోంది. రాష్ట్రానికి ఇప్పటివరకు 1,68,61,809 వ్యాక్సిన్ డోసులను కేంద్రం అందించింది. ప్రస్తుతం రాష్ట్రంలో 13.18 లక్షల డోసులు నిల్వ ఉన్నాయి. చివరి వ్యక్తి వరకు వ్యాక్సిన్ ఉచితంగా అందిస్తాం. అందరూ విధిగా వ్యాక్సిన్ తీసుకోవాలి. వ్యాక్సిన్ వల్ల ఎలాంటి దుష్ఫలితాలు లేవు.''