'భారతీయులను బయటకు పంపే ఆలోచన కేంద్రానికి లేదు'

ఏ ఒక్క భారతీయుడిని దేశం నుంచి పంపే ఆలోచన కేంద్రానికి లేదని కేంద్ర మంత్రి కిషన్​రెడ్డి స్పష్టం చేశారు. జాతీయ పౌర పట్టిక ఏ విధంగా నష్టమో చర్చకు రావాలని రాహుల్​ గాంధీకి సవాల్​ విసిరారు. అమిత్​ షాను సవాల్​ చేసే స్థాయి అసదుద్దీన్​కు లేదని మండిపడ్డారు.

జాతీయ పౌరపట్టిక, ఎన్​ఆర్​సీ, సీఏఏ, జీఎస్టీల మధ్య తేడా కూడా రాహుల్ గాంధీకి తెలియదని కేంద్ర హోం శాఖ సహాయ మంత్రి కిషన్ రెడ్డి ఎద్దేవా చేశారు. ఎన్​పీఆర్ దేశానికి ఏవిధంగా నష్టమో, భారతీయులను విదేశాలకు ఎలా పంపిస్తుందో రాహుల్ చర్చకు రావాలని సవాల్ విసిరారు. దేశంలోకి ఇష్టం వచ్చినట్లు ఎవరైనా రావచ్చనకున్నప్పుడు... దేశానికి సరిహద్దులు, భద్రతా దళాలు ఎందుకున్నారని ప్రశ్నించారు.

ఎన్​పీఆర్​కు ధ్రువపత్రాలు అవసరం లేదు

జాతీయ పౌరపట్టికకు, జనాభా లెక్కల సేకరణకు పెద్ద తేడా ఉండదని, ఆ రెండింటినీ వేర్వేరుగా చూడాల్సిన అవసరం లేదని కిషన్​రెడ్డి స్పష్టం చేశారు. ఎన్​పీఆర్ కోసం డాక్యుమెంట్లు కచ్చితంగా ఇవ్వాల్సిన అవసరం లేదన్నారు. భవిష్యత్తులో అభివృద్ధి, సంక్షేమ కార్యక్రమాలు, నియోజకవర్గాల పునర్విభజన, రాష్ట్రాలకు నిధుల కేటాయింపు వంటి అంశాలకు ఎన్​పీఆర్ వివరాలు ఉపయోగపడతాయని తెలిపారు. ఎన్​పీఆర్​కు, ఎన్​సీఆర్​కు ఎలాంటి సంబంధం లేదని వెల్లడించారు.

తప్పుడు ప్రచారం చేస్తున్నారు

కొన్ని రాజకీయ పార్టీల నేతలు బాధ్యతా రహితంగా దుష్ప్రచారం చేసి, ప్రజల్ని రెచ్చగొడుతున్నారని కిషన్​రెడ్డి మండిపడ్డారు. భారతీయులను విదేశాలకు పంపిస్తారని కొందరు తప్పుడు ప్రచారంతో ఉద్రిక్తతలను సృష్టిస్తున్నారని ఆరోపించారు. ఏ ఒక్క భారతీయుడిని బయటకు పంపించే ఆలోచన కేంద్రానికి లేదని, రాజ్యాంగం ప్రకారం అలాంటి చట్టం ఏ ప్రభుత్వమూ చేయలేదని కిషన్ రెడ్డి స్పష్టం చేశారు.

రాజ్యాంగమే పవిత్ర గ్రంథం

జాతీయ పౌరపట్టిక, జనన గణన రాజ్యాంగబద్ధంగా జరుగుతాయని కిషన్ రెడ్డి తెలిపారు. మోదీ సర్కారుకు రాజ్యాంగమే అత్యంత పవిత్ర గ్రంథమని స్పష్టం చేశారు. జనాభా లెక్కల సేకరణలో మొబైల్ యాప్, ఇతర సాంకేతిక పరిజ్ఞానం వినియోగిస్తామని, ప్రజలే సొంతంగా వివరాలు సమర్పించే అవకాశం కూడా ఉంటుందన్నారు.

• ఇదీ చూడండి : 'పౌర' సెగతో భారతీయ రైల్వేకు రూ.80కోట్లు నష్టం