Covid Fourth Wave : దేశంలో కొవిడ్ నాలుగో దశ మొదలైందా? కొత్తగా నమోదవుతున్న కేసుల్లో పెరుగుదల, వారం రోజుల సగటు పరిశీలిస్తే అవుననే అన్పిస్తుంది. ఏప్రిల్‌ 16న వారం రోజుల సగటు 975 కేసులతో కనిష్ఠానికి పడిపోగా, తర్వాత రెండు వారాల్లోనే సగటు 3వేల కేసులకు పెరిగింది. ఇది నిలకడగా కొనసాగుతుందా లేక పెరుగుతుందా?.. అనేది రోగ నిరోధక శక్తిపై ఆధారపడి ఉంటుందని సీసీఎంబీ సలహాదారు రాకేశ్‌మిశ్రా, శాస్త్రవేత్త వినయ్‌కుమార్‌ తెలిపారు. ప్రస్తుతం ఒమిక్రాన్‌ ఉప రకాలే వ్యాప్తిలో ఉన్నాయని, వీటిలో ఆందోళన కలిగించే మార్పులేవీ గుర్తించలేదని తెలిపారు.
* వైరస్‌లో కొత్త ఉత్పరివర్తనాలు వస్తుంటాయి. ఆర్‌ఎన్‌ఏ వైరస్‌లో ఇది సర్వసాధారణం. ఇందులోని అన్నీ ఉత్పరివర్తనాలు ప్రమాదం కావు. వైరస్‌ జన్యుక్రమ పరిశోధనలో కొత్తగా రీ-కాంబినెంట్‌ వేరియంట్లు కనుగొన్నారని, ఇవి అధిక వ్యాప్తికి దారితీస్తున్నట్లు కన్పించలేదని ఇన్సాకాగ్‌ తెలిపింది. దిల్లీలో ఒమిక్రాన్‌ ఉపరకమైన బి.ఏ.2.12.1 గుర్తించినట్లు పేర్కొంది.
* ప్రస్తుతం కేసులు పెరుగుతున్న చోట బి.ఏ.2.12; బి.ఎ.2.12.1 రకాలే కనిపిస్తున్నాయి. ఒమిక్రాన్‌ రోగనిరోధక శక్తిని ఏమార్చగలదని మూడో దశ నిర్ధారించింది. అప్పటికే కొవిడ్ బారిన పడి, టీకా రెండు డోసులు వేసుకున్నా ఈ వైరస్‌ ప్రభావానికి గురయ్యారు. అయితే ప్రస్తుతం కేసులు పెరుగుతున్న చోట తీవ్రమైన లక్షణాలు, ఆసుపత్రిలో చేరడం వంటి పరిస్థితులు లేవని, అయినా నాలుగో దశను ముందుగా గుర్తించేందుకు మురుగునీటి నమూనాలపై సీసీఎంబీ పరిశోధనలు చేస్తోందని శాస్త్రవేత్తలు చెబుతున్నారు. కేసుల పెరుగుదల తీరు నాలుగైదురోజుల ముందే తెలుసుకోవచ్చంటున్నారు.