పాదయాత్రకు బయలుదేరుతూ భావోద్వేగానికి లోనైన ఆర్​ఎస్​ ప్రవీణ్ కుమార్​

Bahujan Rajyadhikara Yatra: బహుజన రాజ్యాధికార యాత్ర చేపట్టడానికి ఇంటి నుంచి బయలుదేరుతూ ఆర్​ఎస్​ ప్రవీణ్​ కుమార్ భావోద్వేగానికి లోనయ్యారు​. కుటుంబసభ్యులను దగ్గరకు తీసుకుని ధైర్యం చెప్పారు. తరాల తలరాతను మార్చేందుకు సిద్ధమవుతున్నానంటూ.. కుటుంబీకులకు వీడ్కోలు చెబుతూ బరువైన హృదయంతో బయటకు నడిచారు. అనంతరం సికింద్రాబాద్​లోని అమరవీరుల స్తూపం వద్ద నివాళులర్పించారు.

Bahujan Rajyadhikara Yatra: నిరుద్యోగ యువత, అణగారిన వర్గాల అభ్యున్నతి, రైతుల శ్రేయస్సే లక్ష్యంగా... బీఎస్పీ రాష్ట్ర సమన్వయకర్త ఆర్​ఎస్​ ప్రవీణ్​ కుమార్ తలపెట్టిన 300 రోజుల బహుజన రాజ్యాధికార యాత్ర ప్రారంభమైంది. ముందుగా సికింద్రాబాద్ అమరవీరుల స్తూపం వద్ద నివాళులర్పించారు. అనంతరం నాగదేవత ఆలయంలో ప్రత్యేక పూజలు నిర్వహించారు. కార్యక్రమానికి పెద్ద ఎత్తున బహుజన సమాజ్​ వాదీ పార్టీ శ్రేణులు తరలివచ్చారు. అక్కడి నుంచి జనగామ జిల్లా ఖిలాషాపూర్​ బయలుదేరారు.

భావోద్వేగంతో ఆర్​ఎస్​

అంతకుముందుగా ఇంటి నుంచి బయలుదేరిన ఆర్ఎస్​ ప్రవీణ్​ కుమార్.. కుటుంబీకుల నుంచి వీడ్కోలు తీసుకుంటూ భావోద్వేగానికి లోనయ్యారు. 300 రోజులు కుటుంబానికి దూరంగా ఉంటున్నానన్న భావన.. ఆయనను ఉద్వేగానికి గురిచేసింది. వారిని దగ్గరకు తీసుకుని ధైర్యం చెప్పారు. 300 రోజుల పాటు కుటుంబంతో ఉండే అవకాశం లేదన్న భావన ఓ వైపు కలచి వేస్తున్నా.. బహుజన రాజ్య స్థాపన ద్వారా తరాల తలరాతను మార్చే చారిత్రక అవకాశం గొప్ప అవకాశమిచ్చిందని పేర్కొన్నారు.

నియంత పాలన నుంచి విముక్తి

ప్రస్తుతం రాష్ట్రం కష్టాల్లో కూరుకుపోయిందని... యువత ఉద్యోగాల కోసం ఎదురుచూస్తున్నారని ప్రవీణ్​ కుమార్ అన్నారు. తెలంగాణ కోసం ఆత్మ బలిదానాలు చేసిన వారి త్యాగఫలాల మీద కేసీఆర్​ కుటుంబం రాజ్యమేలుతోందని ఆరోపించారు. ఈ యాత్ర ద్వారా రాష్ట్రానికి నిరంకుశ పాలన నుంచి విముక్తి కల్పించేందుకు కృషి చేస్తానని స్పష్టం చేశారు. తెరాస వైఫల్యాలను 300 రోజుల యాత్రలో ప్రజలకు వివరిస్తానని ప్రవీణ్​ కుమార్​ వెల్లడించారు.

ఇదీ చదవండి:జైలుకు వెళ్తాననే భయంతోనే కేసీఆర్ రాష్ట్రాల పర్యటన: బండి సంజయ్‌