Brutal Murder a person in Medchal: వారిద్దరూ ప్రేమించి పెళ్లి చేసుకున్నారు. ఇది యువతి తల్లిదండ్రులకు నచ్చలేదు. దీంతో ఆ దంపతులు వేరే ప్రాంతంలో నివాసం ఉంటున్నారు. అయినా అమ్మాయి తరఫు బంధువులు సదరు యువకుడిపై పగ పెంచుకున్నారు. అతడిని ఎలాగైనా అంతమొందించాలని ప్లాన్ వేశారు. ఈ క్రమంలోనే వారి కదలికలపై నిఘా పెట్టారు. చివరకు యువతి కళ్లెదుటే యువకుడిని దారుణంగా హత్య చేసి అమ్మాయిని తీసుకెళ్లిపోయారు. ఈ దారుణ ఘటన మేడ్చల్-మల్కాజిగిరి జిల్లాలో చోటుచేసుకుంది.
దూలపల్లిలోని సూరారం కాలనీలో హరీశ్ కుటుంబం 6 నెలలుగా నివాసం ఉంటోంది. గతంలో ఎర్రగడ్డలో నివాసం ఉన్న సమయంలో ఓ అమ్మాయిని ప్రేమించాడు. ఇది కాస్త యువతి తల్లిదండ్రులకు తెలియడంతో వారు యువకుడిని హెచ్చరించారు. దీంతో అతడు దూలపల్లికి మకాం మార్చాడు. అక్కడ ఓ అందమైన ఇంటిని నిర్మించుకుని గతంలో ప్రేమించిన అమ్మాయినే వివాహం చేసుకుని హాయిగా జీవిస్తున్నారు.
ప్రేమ వ్యవహారమే కారణం..: దీంతో హరీశ్పై పగ పెంచుకున్న అమ్మాయి కుటుంబ సభ్యులు అతడిని ఎలాగైనా అంతం చేయాలని పథకం వేశారు. ఇందుకోసం వారి కదలికలపై నిఘా పెట్టి రెండు రోజుల క్రితం దూలపల్లి వద్ద దంపతులు ఉండగా.. అమ్మాయి హరీశ్ను కత్తులతో పొడిచి దారుణంగా హత్య చేశారు. అనంతరం అమ్మాయిని తమతో పాటు తీసుకెళ్లారు. దీనిపై సమాచారం అందుకున్న పోలీసులు ఘటనా స్థలానికి చేరుకొని మృతదేహాన్ని స్వాధీనం చేసుకున్నారు. పోస్టుమార్టం నిమిత్తం గాంధీ ఆసుపత్రికి తరలించారు. ప్రేమ వ్యవహారమే హరీశ్ హత్యకు కారణమని పోలీసులు తెలిపారు. ఈ ఘటనపై కేసు నమోదు చేసుకొని విచారణ చేపట్టారు.