BRS on Telangana Assembly Elections 2023 : విపక్షాలకు ఛాన్స్ ఇవ్వకుండా BRS దూకుడు.. హ్యాట్రిక్ దిశగా కేసీఆర్ కీలక నిర్ణయాలు

BRS on Telangana Assembly Elections 2023 : మూడోసారి అధికారంలోకి రావడమే లక్ష్యంగా పెట్టుకున్న బీఆర్ఎస్ సర్కార్‌ దూకుడు పెంచింది. ప్రజల్ని తమవైపు తిప్పుకునే నిర్ణయాలతో.. విపక్షాలకు ఎలాంటి అస్త్రాలు ఇవ్వకూడదనే లక్ష్యంతో నిర్ణయాల్లో వేగం పెంచింది. ఇందులో భాగంగానే రైతు రుణమాఫీని పునఃప్రారంభించిన ప్రభుత్వం.. మరికొన్ని నిర్ణయాలు తీసుకుంటుందనే ప్రచారం జోరుగా సాగుతోంది. ప్రభుత్వంలో ఆర్టీసీ కార్మికుల విలీనం, వీఆర్ఏ వ్యవస్థ రద్దు వంటి నిర్ణయాలు ప్రయోజనం చేకూర్చుతాయని అధికార పార్టీ నేతలు అంచనావేస్తున్నారు.

BRS Focus on Telangana Assembly Elections : అసెంబ్లీ ఎన్నికలకు సమయం దగ్గరపడటంతో. ప్రజల్లో సానుకూల ప్రభావం కలిగించే నిర్ణయాలపై బీఆర్ఎస్ సర్కార్‌ దృష్టిసారించింది. విపక్షాలకు ఎలాంటి అస్త్రాలు ఇవ్వకూడదని లక్ష్యంగా పెట్టుకుంది. నాలుగేళ్లుగా పెండింగ్‌లో ఉన్నరైతు రుణమాఫీని పూర్తిస్థాయిలో అమలు చేయాలని నిర్ణయించడమే దీనికి నిదర్శనంగా నిలుస్తోంది. ఇందుకోసం రూ.19,000 కోట్లను కేటాయించింది. నెలన్నరలోగా ఈ మొత్తాన్ని జమ చేయాలంటే అందుకు తగ్గట్లుగా నిధులను సమీకరించుకోవాల్సి ఉంటుంది.

BRS Strategy for Telangana Assembly Elections 2023 : ఇప్పటికే రాష్ట్ర ఖజానాపై భారం ఎక్కువగా ఉన్నప్పటికి.. ఎన్నికల్లో ఇదే అంశాన్ని విపక్షాలు ప్రచారాస్త్రంగా చేసుకొనే అవకాశం ఎక్కువగా ఉండటంతో రుణమాఫీ చేయాలని నిర్ణయించినట్లు తెలిసింది. గత ఎన్నికల సమయంలో లక్ష వరకు రుణమాఫీ చేస్తామని హామీ ఇచ్చినా.. తర్వాత కాలంలో కరోనా కారణంగా రాష్ట్ర ఆదాయం తగ్గడం, ఇతర వ్యయాలు పెరగడంతో ఈ అంశాన్ని పక్కన పెట్టింది.

తిరిగి పునఃప్రారంభించిన ప్రభుత్వం.. గురువారమే రూ.18,241 కోట్ల బడ్జెట్‌ విడుదలకు ఉత్తర్వులు ఇచ్చింది. రూ.37,000 నుంచి రూ.41,000 లోపు రుణమున్న 62,758 మంది రైతుల ఖాతాల్లో రూ.237.85 కోట్లు జమ చేసింది. ఎన్నికలకు ముందుగా అన్నదాతలకు రుణమాఫీ మొత్తం చేరుతుండటంతో అందరికి గుర్తుండిపోతుందని, ఎన్నికల్లోనూ దీని ప్రభావం ఉంటుందని బీఆర్ఎస్ వర్గాలు అభిప్రాయపడ్డాయి. రుణమాఫీని విస్తృతంగా రైతుల్లోకి తీసుకెళ్లడానికి వీలుగా రాష్ట్రవ్యాప్తంగా సంబరాలు కూడా నిర్వహిస్తోంది.

Telangana Assembly Elections 2023 : ఈ క్రమంలోనే రైతుల విషయంలో నిర్ణయం తీసుకుని ఒకరోజు గడవక ముందే.. ఉద్యోగ సంఘాల నాయకులు సీఎం కేసీఆర్‌ను కలిశారు. పీఆర్‌సీపై కమిషన్‌ ఏర్పాటు చేయడం.. మధ్యంతర భృతిని త్వరలోనే ప్రకటించడం లాంటివి ఈ సందర్భంగా చర్చకు వచ్చాయి. వీటిపైనా ముఖ్యమంత్రి సానుకూలంగా స్పందించినట్లు ఉద్యోగ సంఘాల నాయకులు పేర్కొన్నారు. దీన్నిబట్టి త్వరలోనే పీఆర్‌సీ ఏర్పాటుతోపాటు ఐ.ఆర్‌.పైనా నిర్ణయం తీసుకొనే అవకాశముంది.

KCR Plans for hattrick Win in Telangana Assembly Elections 2023 : ఇటీవల ప్రభుత్వం దివ్యాంగుల పింఛన్లను రూ.3016 నుంచి రూ.4016కు పెంచింది. ఇతర ఆసరా పింఛన్లు నెలకు రూ.2016 వంతున ఇస్తున్నారు. వీటిని కూడా పెంచుతారనే ప్రచారం జరుగుతోంది. ఈ క్రమంలోనే ఈ పెంపు జరిగితే ఎక్కువ మందిపై ప్రభావం చూపే అవకాశం ఉంది. ఇలా వీలైనన్ని సానుకూల నిర్ణయాలు తీసుకోవడం ద్వారా ఎన్నికల్లో మరింత దూకుడు పెంచాలనేది బీఆర్ఎస్ అభిప్రాయంగా స్పష్టమవుతోంది.

ఈ నేపథ్యంలోనే కొత్తగా కూడా కొన్ని నిర్ణయాలు తీసుకొనే అవకాశం ఉందని ఆయా వర్గాలు పేర్కొంటున్నాయి. నిరుద్యోగ భృతి అంశం పెండింగ్‌లో ఉన్నా.. దీనిపై రానున్న ఎన్నికలలోపు ఎలాంటి నిర్ణయం తీసుకోకపోవచ్చని తెలుస్తోంది. ఆర్టీసీ కార్మికులను ప్రభుత్వ ఉద్యోగులుగా గుర్తించడం, వీఆర్‌ఏ వ్యవస్థను రద్దు చేశారు. అందులోని 24,000 మందిని ప్రభుత్వ ఉద్యోగులుగా తీసుకోవడం, సానుకూల ప్రభావాన్ని చూపుతుందని పేర్కొంటున్నాయి. పట్టణ ప్రాంతాల్లోని నియోజకవర్గాల్లో దీని ప్రభావం ఎక్కువగా ఉంటుందని బీఆర్​ఎస్​ వర్గాలు భావిస్తున్నాయి.

BRS on Telangana Assembly Elections :మరోవైపు ఆత్మీయ సమ్మేళనాల ద్వారా నాయకులు, కార్యకర్తలందరిని బీఆర్ఎస్ భాగస్వాములను చేసింది. మరోవైపు దశాబ్ది ఉత్సవాలసందర్భంగా ప్రభుత్వం 21 రోజులపాటు పెద్ద ఎత్తున కార్యక్రమాలు చేపట్టింది. ఇవి కూడా ప్రజలకు మరింత దగ్గర చేశాయనే అభిప్రాయం ఆ పార్టీ వర్గాల్లో బలంగా ఉంది.