జోరుగా బీఆర్ఎస్‌ లోక్‌సభ సన్నాహక సమావేశాలు - పార్టీ శ్రేణుల అభిప్రాయాలపై అధినేత కేసీఆర్‌ అధ్యయనం

BRS Lok Sabha Preparatory Meetings : సన్నాహక సమావేశాల్లో నేతలు, శ్రేణుల నుంచి వస్తున్న అభిప్రాయాలు, సూచనలను భారత్ రాష్ట్ర సమితి అధినేత కేసీఆర్ అధ్యయనం చేస్తున్నారు. అభిప్రాయాలను చదువుతున్న ఆయన, కొందరితో ఫోన్‌లో మాట్లాడారు. విశ్రాంతిలో ఉన్న కేసీఆర్ ఎప్పటికప్పుడు నాయకుల ద్వారా సన్నాహక సమావేశాల తీరును తెలుసుకుంటున్నారు. సంస్థాగతంగా పార్టీని బలోపేతం చేయాలని నిర్ణయించిన బీఆర్ఎస్, త్వరలోనే శిక్షణా తరగతులు ఏర్పాటు చేయడంతో పాటు జిల్లా పార్టీ కార్యాలయాలను పటిష్ఠం చేసే కార్యాచరణ అమలు చేయనుంది.

BRS Lok Sabha Preparatory Meetings : హ్యాట్రిక్‌పై కన్నేసి ఓటమి పాలైన భారత్ రాష్ట్ర సమితి, లోక్‌సభ ఎన్నికల కసరత్తు కొనసాగిస్తోంది. నియోజకవర్గాల వారీగా సన్నాహక సమావేశాలు నిర్వహిస్తోంది. ఆయా నియోజకవర్గాల పరిధిలోని ప్రజాప్రతినిధులు, మాజీలు, ముఖ్య నేతలను ఆహ్వానిస్తున్నారు. ఒక్కో శాసనసభ నియోజకవర్గం నుంచి వంద మందికి పైగా సన్నాహక సమావేశాలకు వస్తున్నారు.

ముఖ్య నేతలు వారికి దిశానిర్ధేశం చేయడంతో పాటు అభిప్రాయాలు తీసుకుంటున్నారు. ప్రతి రోజూ భోజన విరామం అనంతరం వారి నుంచి సూచనలు, సలహాలు తీసుకుంటున్నారు. ఒక్కో సమావేశంలో (BRS LokSabha Preparatory Meetings)20 నుంచి 40 మంది వరకు తమ అభిప్రాయాలు చెప్తున్నారు. ప్రధానంగా కార్యకర్తలు, ఉద్యమంలో కలిసి తిరిగిన వారిని అధికారంలో ఉన్నప్పుడు పట్టించుకోలేదని ఫిర్యాదులు వచ్చాయి. ప్రభుత్వ సంక్షేమ కార్యక్రమాల లబ్ధి నేరుగా అందిస్తుండడంతో పార్టీ, కార్యకర్తల ప్రమేయం లేకుండా పోయిందని అంటున్నారు.

BRS Focus on Lok Sabha Elections 2024పార్టీ పేరును తెలంగాణ రాష్ట్ర సమితి నుంచి భారత్ రాష్ట్ర సమితిగా మార్చడంతో, తెలంగాణ అస్థిత్వాన్ని కోల్పోయే పరిస్థితి వచ్చిందని మరికొందరు పేర్కొన్నారు. వేదికపై కూర్చొన్న కొందరు నేతలు కూడా ఈ అభిప్రాయాన్ని వ్యక్తం చేశారు. రెండు పడకల గదుల ఇళ్లు ఆశించిన మేర ఇవ్వకపోవడం, రుణమాఫీ అమలు జరగకపోవడంతో పాటు దళితబంధు, బీసీ బంధు లాంటి పథకాలు నష్టం చేశాయని నాయకులు చెబుతున్నారు.

ఇదే సమయంలో చేసిన పనులను సరిగ్గా చెప్పుకోకపోవడం, ప్రత్యర్థుల దుష్ప్రచారాన్ని తిప్పికొట్టకపోవడం, పార్టీలోని గ్రూపు తగాదాలు ఓటమికి దారి తీశాయని అంటున్నారు. కొందరికే అన్ని పదవులు ఇవ్వడం ఇబ్బందికరంగా మారిందని చెప్తున్నారు. నేరుగా అభిప్రాయాలు చెప్పిన వారు కాకుండా మిగతా వారి నుంచి లిఖిత పూర్వకంగానూ సూచనలు, సలహాలు తీసుకుంటున్నారు. కొన్నింటిపై కేటీఆర్(KTR), హరీశ్‌రావు సహా సీనియర్ నేతలు అక్కడే స్పందిస్తున్నారు. అందులో భాగంగానే చిన్న చిన్న పొరపాట్లు జరిగాయని, ఇక నుంచి పార్టీని సంస్థాగతంగా బలోపేతం చేస్తామని చెప్తున్నారు.

BRS Focus on Parliament Elections 2024 :గ్రామస్థాయి నుంచి రాష్ట్ర స్థాయి వరకు కమిటీలను ఏర్పాటు చేసి, తరచూ సమావేశాలు నిర్వహిస్తామని చెబుతున్నారు. బీఆర్ఎస్ శ్రేణులకు శిక్షణా కార్యక్రమాలు నిర్వహించడంతో పాటు జిల్లా పార్టీ కార్యాలయాలను బలోపేతం చేసేలా కార్యాచరణ చేపట్టేందుకు సిద్ధమవుతున్నారు. అటు నేతలు, కార్యకర్తల నుంచి వస్తున్న అభిప్రాయాలు, సూచనలను పార్టీ అధినేత కేసీఆర్ అధ్యయనం చేస్తున్నారు.

లోక్‌సభ సన్నాహక సమావేశాలు జరుగుతున్న తీరును కేసీఆర్ (KCR) నిశితంగా గమనిస్తున్నారు. విశ్రాంతిలో ఉన్నప్పటికీ ఎప్పటికప్పుడు సీనియర్లకు ఫోన్ చేసి ఏ నియోజకవర్గం నుంచి ఎంత మంది వచ్చారు, ఫలానా వ్యక్తి హాజరయ్యారా, ఎలాంటి అభిప్రాయాలు వస్తున్నాయని ఆరా తీస్తున్నారు. సన్నాహక సమావేశాల్లో వస్తున్న అభిప్రాయాలు, సూచనలను కేసీఆర్‌కు ప్రతి రోజూ నివేదిస్తున్నారు. ఆయన వాటిని చదువుతున్నారు.

అభిప్రాయాలు, సూచనలు చేసిన కొందరు నేతలతో కేసీఆర్ ఫోన్లోనూ మాట్లాడారు. ఆదిలాబాద్ నియోజకవర్గానికి చెందిన కొందరితో ఆయన ఇప్పటికే ఫోన్లో మాట్లాడారు. వాళ్లు వ్యక్తం చేసిన అభిప్రాయాలపై మరింత వివరణ తీసుకున్నట్లు సమాచారం. దీంతో పాటు ఏం చేస్తే బాగుంటుందన్న విషయమై కూడా వారితో కేసీఆర్ చర్చిస్తున్నారు.