MLAs Poaching Case Update: టీఆర్ఎస్ ఎమ్మెల్యేలను ప్రలోభపెట్టిన వ్యవహారంలో సిట్ ఎదుట బీజేపీ జాతీయ ప్రధాన కార్యదర్శి బీఎల్ సంతోశ్, తుషార్, జగ్గుస్వామి, న్యాయవాది శ్రీనివాస్ విచారణకు హాజరుకానున్నారు. వీరి విచారిస్తే కొత్త విషయాలేమైనా వెలుగులోకి వస్తాయని పోలీసులు భావిస్తున్నారు. ప్రధానంగా సంతోశ్ విచారణకు రావాల్సి ఉండటం రాజకీయంగా ప్రాధాన్యం సంతరించుకుంది. నలుగురిలో ఎవరెవరు సిట్ ముందుకు వస్తారనేది తేలాల్సి ఉంది. ఈ నెల 29లోపు కేసు దర్యాప్తులో పురోగతిని హైకోర్టుకు సమర్పించాల్సి ఉండటంతో కీలక ఆధారాల్ని సేకరించాలని సిట్ భావిస్తోంది.
ఎమ్మెల్యేలకు ఎర కేసులో ఉత్కంఠ.. నేడు ఆ నలుగురూ వచ్చేనా..!
MLAs Poaching Case Update: ఎమ్మెల్యేలకు ఎర కేసులో ప్రత్యేక దర్యాప్తు బృందం బీజేపీ జాతీయ ప్రధాన కార్యదర్శి బీఎల్ సంతోశ్ సహా నలుగురు కీలక అనుమానితులను నేడు విచారించనుంది. ఇప్పటికే ఈ కేసులో విచారణకు హాజరు కావాలని సంతోశ్తో పాటు కేరళకు చెందిన వైద్యుడు జగ్గు స్వామి, కేరళలోని భారత్ ధర్మ జనసేన పార్టీ అధ్యక్షుడు తుషార్ వెల్లాపల్లి, కరీంనగర్ న్యాయవాది బూసారపు శ్రీనివాస్కు సిట్ నోటీసులు జారీ చేసింది. కేసు దర్యాప్తులో వీరి వాంగ్మూలాలు కీలకమని పోలీస్ అధికారులు భావిస్తున్నారు.
MLAs Poaching Case Update
ప్రణాళిక సిద్ధం..: టీఆర్ఎస్ ఎమ్మెల్యేలు పైలట్ రోహిత్రెడ్డి, గువ్వల బాలరాజు, రేగా కాంతారావు, బీరం హర్షవర్ధన్ రెడ్డిలను బీజేపీలో చేరాలంటూ ప్రలోభపెట్టేందుకు యత్నించారనే అభియోగాలపై గత నెల 26న రామచంద్రభారతి, సింహయాజీ, నంద కుమార్ను పోలీసులు అరెస్ట్ చేశారు. వీరిని విచారించిన క్రమంలో వెలుగులోకి వచ్చిన అంశాల ఆధారంగా నలుగురికి నోటీసులు జారీ చేశారు. వీరికి సంధించేందుకు ప్రశ్నావళిని సిట్ ఇప్పటికే రూపొందించింది. మొయినాబాద్ ఫామ్హౌస్లో మంతనాలు సాగించిన రోజు రామచంద్రభారతి.. తన ఫోన్ నుంచి తుషార్తో మాట్లాడారు. పైలట్ రోహిత్రెడ్డితోనూ మాట్లాడించారు. ఈ నేపథ్యంలో ఎమ్మెల్యేలను ప్రలోభపెట్టే అంశంలో తుషార్కు గల సంబంధంపై విచారించనున్నారు.
లోతుగా ఆరా..: రామచంద్రభారతి ఫోన్ నుంచి 'సంతోశ్ బీజేపీ' పేరిట ఉన్న నంబర్కు మెసేజ్లు వెళ్లాయి. వాటిలో ఎమ్మెల్యేల కొనుగోలుకు సంబంధించిన సమాచారం ఉంది. అయితే సంతోశ్ తిరిగి సమాధానం ఇచ్చినట్లు లేదు. ఈ మెసేజ్ల గురించి సంతోశ్ను ఆరా తీయనున్నారు. సింహయాజీ తిరుపతి నుంచి హైదరాబాద్కు వచ్చేందుకు న్యాయవాది శ్రీనివాస్ విమాన టికెట్ బుక్ చేసినట్లు ఆరోపణలున్నాయి. సింహయాజీకి టికెట్ బుక్ చేయాల్సిన అవసరమేముంది? ఆయనతో సంబంధమేంటన్న అంశంపై ప్రశ్నించనున్నారు. రామచంద్ర భారతికి తుషార్ను పరిచయం చేసింది డాక్టర్ జగ్గుస్వామి అని చెబుతున్నారు. తుషార్, జగ్గుస్వామి ఇద్దరూ కేరళవాసులే కావడంతో కుట్రలో వీరి ప్రమేయంపై విచారించనున్నారు. రామచంద్ర భారతి సంభాషణల్లో నంబర్ 1, నంబర్ 2 అంటూ ప్రస్తావన ఉంది. వారెవరనే స్పష్టత కోసం సిట్ ఆరా తీస్తోంది.
TAGGED:
తెలంగాణ తాజా వార్తలు