కేటీఆర్​ అవగాహన లేకుండా మాట్లాడుతున్నారు: లక్ష్మణ్

కేంద్ర, రాష్ట్ర ప్రభుత్వాల కలిసి పనిచేస్తేనే దేశం వేగంగా అభివృద్ధి చెందుతుని భాజపా రాష్ట్ర అధ్యక్షుడు లక్ష్మణ్ అన్నారు. కేంద్ర బడ్జెట్​పై మంత్రి కేటీఆర్​ అవగాహన లేకుండా మాట్లాడుతున్నారని మండిపడ్డారు.

ప్రాజెక్టుల పేరిట కమీషన్లు దండుకునేందుకు కేంద్రం నిధులు ఇవ్వదని భాజపా రాష్ట్ర అధ్యక్షుడు లక్ష్మణ్ అన్నారు. తెలంగాణ ప్రజల సంక్షేమం, ప్రయోజనాల నిమిత్తమే బడ్జెట్​లో నిధులు కేటాయించిందని స్పష్టం చేశారు.

రాష్ట్రంలో ఆదాయ వనరులు సమకూర్చుకోవడానికి నిర్దిష్టమైన ప్రణాళిక లేదని, మద్యంపై ఆదాయం తప్పితే మిగతా వాటిపై ఎలాంటి ఆదాయం లేదని లక్ష్మణ్ అన్నారు. కేసీఆర్​ కేంద్రమంత్రిగా ఉన్నప్పుడు రాష్ట్రానికి ఎన్ని నిధులు తీసుకువచ్చారని ప్రశ్నించారు.

తెలంగాణ గజినిగా మంత్రి కేటీఆర్​ మారిపోయారని ఎద్దేవా చేశారు. కేంద్రం ఎంత సాయం చేస్తున్నా గుర్తుండట్లేదని విమర్శించారు. కాళేశ్వరం ప్రాజెక్టుకు సంబంధించి డీపీఆర్​ సమర్పించకుండా, జాతీయ హోదా ఎలా అడుగుతారని నిలదీశారు. బైంసా ఘటనపై నిజనిర్ధారణ కమిటీ వేశామని త్వరలోనే నివేదిక ఇస్తామని పేర్కొన్నారు.

అన్ని వర్గాలకు మేలు చేసేలా కేంద్ర బడ్జెట్‌ ఉందని లక్ష్మణ్ అన్నారు. పేద మధ్య తరగతి ప్రజలు బడ్జెట్‌ను స్వాగతిస్తున్నారని పేర్కొన్నారు.

• ఇవీ చూడండి:అశ్వత్ధామరెడ్డికి నోటీసులు.. అందుకేనట!