BJP manifesto 8 ఏళ్లలో మునుగోడులో తెరాస సర్కార్ చేయని అభివృద్ధిని.. కేంద్ర నిధులతో ఏడాదిన్నరలో చేసి చూపిస్తామని భాజపా ప్రకటించింది. మునుగోడు ఎన్నికల ప్రణాళికను భాజపా అభ్యర్థి కోమటిరెడ్డి రాజగోపాల్ రెడ్డి... ఈటల రాజేందర్ , వివేక్ సహా ఇతర నేతలతో కలిసి మునుగోడు ఎన్నికల ప్రణాళికను ఆవిష్కరించారు. కేంద్ర మంత్రులతో మాట్లాడాకే అభివృద్ధిపై హామీ ఇస్తున్నామని వెల్లడించారు.
2 వందల కోట్ల కేంద్ర నిధులతో రోడ్ల అభివృద్ధి, సంస్థాన్ నారాయణపురంలో టెక్స్ టైల్ పార్కు, మునుగోడులో ఫ్లోరైడ్ పరిశోధనా కేంద్రం, 25కోట్లతో చౌటుప్పల్ ఐటీఐ అభివృద్ధి, 100కోట్లతో మూసీ నీళ్లను ఎత్తిపోసి చెరువులను నింపే కార్యక్రమం సహా వివిధ అంశాలను ఎన్నికల ప్రణాళికలో పొందుపరిచారు.
తెలంగాణకు భాజపాయే శ్రీరామ రక్ష... రాష్ట్రం బాగుపడాలంటే... భాజపా వల్లే సాధ్యం. కనీసం రోడ్లు వేయిద్దామన్నా.. కాంట్రాక్టర్లు టెండర్లు వేసే పరిస్థితి లేదు. నియోజకవర్గంలో రూ.200 కోట్లతో రోడ్లు వేయిస్తాం. ఇందుకు అవసరమైన నిధులు ఇచ్చేందుకు నితిన్ గడ్కరీ అంగీకరించారు. చేనేత కార్మికులకు టెక్స్ టైల్ పార్కు, చౌటుప్పల్‌లో రూ. 25 కోట్లతో ఐటీఐ ఏర్పాటు చేస్తాం. ఫ్లోరైడ్ అధికంగా ఉన్న మునుగోడులో సమస్య పరిష్కారానికి ఫ్లోరైడ్ పరిశోధనా కేంద్రాన్ని ఏర్పాటు చేస్తాం. మర్రిగూడలో నవోదయ పాఠశాల ఏర్పాటుకు ప్రయత్నిస్తాం. రూ.100 కోట్లతో మూసీ నీళ్లను చౌటుప్పల్‌లోని గ్రామాలకు ఎత్తి పోసే పథకాన్ని తీసుకొస్తాం. - రాజగోపాల్ రెడ్డి, మునుగోడు అభ్యర్థి