BJP Parliament Prawas Yojana meeting: బీజేపీ పార్లమెంట్ ప్రవాస్ యోజన సమావేశం నేడు హైదరాబాద్లో జరగనుంది. పార్టీ రాష్ట్ర కార్యాలయంలో మధ్యాహ్నం రెండు గంటలకు జరగనున్న ఈ సమావేశానికి బీజేపీ రాష్ట్ర అధ్యక్షుడు బండి సంజయ్ అధ్యక్షత వహించనున్నారు. ప్రవాస్ యోజన సమావేశానికి బీజేపీ జాతీయ ప్రధాన కార్యదర్శి, రాష్ట్ర ఇంచార్జీ సునీల్ బన్సల్ ముఖ్య అతిథిగా హాజరుకానున్నారు. పార్లమెంట్ కన్వీనర్, ప్రభారీ, జిల్లా అధ్యక్షులు, ఇంచార్జీలతో సునీల్ బన్సల్ సమావేశం కానున్నారు.
షా పర్యటనపై చర్చ: రాష్ట్రంలో ఎన్నికలు సమీపిస్తున్న సందర్భంగా పార్టీ సంస్థాగత బలోపేతం, రాష్ట్రంలో తాజా రాజకీయ పరిస్థితులు, తమ పార్టీలో చేరే ఇతర పార్టీల నాయకుల గురించి, షా పర్యటన సహా మరికొన్ని అంశాలపై చర్చించనున్నారు. ఈ నెల 23న చేవెళ్ల పార్లమెంట్ నియోజకవర్గంలో పార్లమెంట్ ప్రవాస్ యోజన కార్యక్రమం నిర్వహించేందుకు పార్టీ శ్రేణులు సన్నాహాలు చేస్తున్నారు. ఈ కార్యక్రమానికి కేంద్ర హోంశాఖ మంత్రి అమిత్ షాను రప్పించేందుకు బీజేపీ రాష్ట్ర నాయకత్వం ప్లాన్ చేస్తోంది. ఇప్పటికే తెలంగాణలో అమిత్ షా పర్యటన వివిధ కారణాల వల్ల పలుమార్లు వాయిదా పడుతూ వస్తుంది.