'అపెక్స్ కౌన్సిల్ భేటీని సద్వినియోగం చేసుకోండి'

కేంద్రంపై విమర్శలు మాని... అపెక్స్ కౌన్సిల్​కు ప్రభుత్వం సన్నద్ధం కావాలని భాజపా రాష్ట్ర అధ్యక్షుడు బండి సంజయ్ సూచించారు. జలాల పంపకం విషయంలో మొదటి నుంచి తెరాస తప్పులు చేస్తుందని... నీళ్లన్నీ ఏపీ ప్రభుత్వం తీసుకెళ్లిపోతున్నా... తమకేమి పట్టనట్లు వ్యవహరిస్తోందని ఆరోపించారు.

ముఖ్యమంత్రి కేసీఆర్ సాగునీటి జలాల విషయంలో మొదటి నుంచి తప్పులు చేస్తూనే ఉన్నారని భాజపా రాష్ట్ర అధ్యక్షుడు బండి సంజయ్‌కుమార్ ఆరోపించారు. తెరాస అవినీతిపై కేంద్రంతో పాటు.. తాము కూడా డేగ కన్నుతో నిఘా పెట్టినట్లు పేర్కొన్నారు.

''ఆంధ్రప్రదేశ్​ ప్రభుత్వం విభజన నిబంధనలు ఉల్లంఘించి ఎక్కువ నీటిని వాడుకున్నప్పుడు కేంద్ర ప్రభుత్వం గుర్తించి హెచ్చరించింది. ఆ సమయంలో కేసీఆర్ ఏమి చేస్తున్నారు? తెలుగురాష్ట్రాల ముఖ్యమంత్రులు ప్రజలను దోచుకుంటున్నారు. 203 జీవో విషయంలో నేను స్పందించి కేంద్రానికి లేఖ రాసేవరకు ముఖ్యమంత్రి ఎందుకు స్పందించలేదు? ఆగస్టు 5వ తేదీన జరగాల్సిన అపెక్స్ కౌన్సిల్​ను ఎందుకు వాయిదా వేయాల్సి వచ్చింది?''

-భాజపా రాష్ట్ర అధ్యక్షుడు బండి సంజయ్

నీళ్లు, నిధులు, నియామకాలకు నిలువెత్తు సాక్ష్యం తెరాస అని సంజయ్ వ్యాఖ్యానించారు. నీళ్లన్నీ ఆంధ్రప్రదేశ్ తీసుకెళ్లిపోతుందని... నిధులతో ముఖ్యమంత్రి జేబులు నింపుకుంటున్నారని... ఇంట్లో ఉన్న ఓ నిరుద్యోగి రానున్న ఎన్నికల్లో నియామకమవుతారని ఆయన ఆరోపించారు.

కేంద్రంపై విమర్శలు మాని... మంగళవారం జరిగే అపెక్స్ కమిటీ భేటీని కేసీఆర్‌ సద్వినియోగం చేసుకోవాలని సూచించారు. జలాల విషయంలో రాష్ట్రానికి న్యాయం జరిగేలా చూడాలని పేర్కొన్నారు.

ఇదీ చూడండి:సానుకూలంగా లేని ఏపీ.. అంతర్రాష్ట్ర జలవివాద చట్టమే శరణ్యం