భాగ్యనగరంలో అంబరాన్నంటిన భాజపా సంబురాలు

దుబ్బాక ఉపఎన్నికల్లో భాజపా గెలుపుతో ఆ పార్టీ కార్యకర్తలు సంబురాలు చేసుకున్నారు. మిఠాయిలు తినిపించుకుని, బాణసంచా కాల్చి, విజయోత్సవ ర్యాలీ నిర్వహించారు. జీహెచ్​ఎంసీ ఎన్నికల్లో కూడా భాజపా విజయకేతనం ఎగురవేయడం ఖాయమని పలువురు నేతలు ధీమా వ్యక్తం చేశారు.

దుబ్బాకలో భాజపా విజయభేరి మోగించడంతో హైదరాబాద్​లో భాజపా నేతల సంబురాలు అంబరాన్నంటాయి. గుడిమల్కాపూర్ కబడ్డీ స్టేడియం వద్ద నాంపల్లి భాజపా ఇన్​ఛార్జి దేవర కర్ణాకర్ ఆధ్వర్యంలో భాజపా కార్యకర్తలు వేడుకలు నిర్వహించారు.ఇది ఎంతో శుభపరిణామమని.. రానున్న జీహెచ్ఎంసీ ఎన్నికల్లో కూడా భాజపా తమ జెండాను ఎగురవేస్తుందని నాయకులు ధీమా వ్యక్తం చేశారు.

సికింద్రాబాద్​లో విజయోత్సవ ర్యాలీ

సికింద్రాబాద్ భాజపా కార్యాలయంలో గ్రేటర్ హైదరాబాద్​ భాజపా ఉపాధ్యక్షుడు బండపల్లి సతీష్ ఆధ్వర్యంలో భాజపా శ్రేణులు సంబురాలు జరుపుకున్నారు. నేతలు మిఠాయిలు తినిపించుకుని, బాణసంచా కాల్చి, విజయోత్సవ ర్యాలీ నిర్వహించారు. ఈ ర్యాలీలో యువత పెద్ద ఎత్తున పాల్గొని ఉత్సాహంగా నాట్యాలు చేశారు. ఎప్పటికైనా న్యాయమే గెలుస్తుందని దుబ్బాక ప్రజలు మరొక్కసారి నిరూపించారని బండపల్లి సతీష్​ అన్నారు.. రఘునందన్ రావుకు శుభాకాంక్షలు తెలిపారు. తెలంగాణ రాజధాని హైదరాబాద్ బల్దియాలో కూడా భాజపా విజయకేతనం ఎగురవేయడం ఖాయమని ఆయన అన్నారు.

ఇవీ చూడండి: దుబ్బాక గెలుపుతో కమలదళంలో కొత్త ఉత్సాహం