పార్లమెంట్​ ఎన్నికల నోటిఫికేషన్​ ఫిబ్రవరి 28న రావచ్చు : కిషన్​రెడ్డి

BJP Leader Kishan Reddy Chit Chat : పార్లమెంట్​ ఎన్నికలకు సంబంధించి సిద్ధంగా ఉన్నామని బీజేపీ రాష్ట్ర అధ్యక్షుడు కిషన్​రెడ్డి తెలిపారు. ఫిబ్రవరి 28 లేదా మార్చి మొదటి వారంలో ఎన్నికల నోటిఫికేషన్​ రావచ్చని అన్నారు. వాటితో పాటు ఎమ్మెల్సీ ఎన్నికలకు సన్నద్ధమవుతున్నామని స్పష్టం చేశారు. ఈ నెల 22న అయోధ్య రామ మందిరంలో ప్రాణప్రతిష్ఠ కార్యక్రమాన్ని దేశ ప్రజలందరూ వీక్షించేలా ఏర్పాట్లు చేస్తున్నామని పేర్కొన్నారు.

BJP Leader Kishan Reddy Chit Chat : ఫిబ్రవరి 28 లేదా మార్చి మొదటి వారంలో పార్లమెంట్ ఎన్నికల నోటిఫికేషన్ రావచ్చునని బీజేపీ రాష్ట్ర అధ్యక్షుడు కేంద్రమంత్రి కిషన్ రెడ్డి(Kishan Reddy) తెలిపారు. తెలంగాణకు సంబంధించి 50 శాతం ఎంపీ అభ్యర్థుల ఎంపిక పూర్తయిందని వెల్లడించారు. ఈ నెల 7, 8 తేదీల్లో పార్టీ రాష్ట్ర స్థాయి సమావేశం ఉంటుందని పేర్కొన్నారు. ఈ సమావేశానికి జాతీయ స్థాయి నేతలు బన్సల్‌, అరవింద్ మీనన్‌, తరుణ్‌ చుగ్‌, ఇతర సీనియర్ నేతలు వస్తున్నారని వివరించారు. ఈ క్రమంలోనే పార్లమెంట్ ఎన్నికలకు సంబంధించిన పర్యటనలు కార్యక్రమాలతో పాటు ఇతర కమిటీలు వేస్తామన్నారు.

Kishan Reddy on MLC Elections in Telangana : హైదరాబాద్‌లో మీడియా ప్రతినిధులతో కిషన్​రెడ్డి ఇష్టాగోష్టి(Kishan Reddy Chit Chat)గా మాట్లాడారు. త్వరలోనే బీజేఎల్పీ నేత ఎన్నిక ఉంటుందని, ఈ ఎన్నిక కోసం పరిశీలకుడు వస్తారని తెలిపారు. గ్రాడ్యుయేట్‌ ఎమ్మెల్సీగా పల్లా రాజీనామాతో ఆ స్థానం ఖాళీగా ఉందన్నారు. ఆ స్థానంలో తమ పార్టీ నేత ప్రకాష్ రెడ్డి టికెట్ ఆశించవచ్చునని అందులో తప్పేమి లేదన్నారు. త్వరలోనే ఎమ్మెల్సీ అభ్యర్థి అంశంపై చర్చించి నిర్ణయం తీసుకుంటామని స్పష్టం చేశారు. ఎమ్మెల్సీ ఎన్నికల్లో పోటీకి సిద్దంగా ఉన్నామని తెలిపారు.

"సుమారు 500 సంవత్సరాల పోరాట ఫలితం తరవాత అయోధ్యలో రామ మందిరాన్ని నిర్మించుకున్నాం. ఈ నెల 22న ప్రాణ ప్రతిష్ఠ కార్యక్రమాన్ని ఘనంగా నిర్వహించేందుకు అన్ని ఏర్పాట్లు చేస్తున్నాం. 15 రోజుల పాటు దేశవ్యాప్తంగా కార్యక్రమాలు నిర్వహించనున్నాం. ప్రాణ ప్రతిష్ఠను తిలకించేందుకు ప్రత్యేకంగా ప్రత్యక్ష ప్రసారాన్ని అందించేలా ప్రణాళికలు చేస్తున్నాం."- కిషన్​రెడ్డి, బీజేపీ రాష్ట్ర అధ్యక్షుడు

Kishan Reddy Arrangements of Ayodhya Mandir Opening: ఐదు వందల సంవత్సరాల పోరాట ఫలితంగా అయోధ్యలో రామమందిర నిర్మాణం పూర్తి అయిందని కిషన్​ రెడ్డి తెలిపారు. ఆ మందిరానికి జనవరి 22న ప్రాణప్రతిష్ఠ కార్యక్రమం జరుగుతుందని గుర్తు చేశారు. ప్రపంచంలోని, దేశంలోని హిందువులందరూ ఈ కార్యక్రమాన్ని తిలకించి తమ ఇళ్ల ముందు జ్యోతులు వెలిగించాలని కేంద్ర మంత్రి కిషన్ రెడ్డి పిలుపునిచ్చారు. అయోధ్యలో రామ మందిరం కార్యక్రమాలు దేశంలో 15 రోజులపాటు కొనసాగుతాయని తెలిపారు. జనవరి 22న జరిగే ప్రాణ ప్రతిష్ఠ కార్యక్రమాన్ని దేశంలోని ప్రతీ ఆలయంలో లైవ్ టెలికాస్ట్ స్క్రీన్లు(Ayodhya Live Telecoast) ఏర్పాటు చేస్తున్నామని పేర్కొన్నారు. వాటి ద్వారా ఆ కార్యక్రమాన్ని ప్రజలందరూ తిలకించాలని కోరారు. పార్లమెంట్ ఎన్నికల కోసమే కాంగ్రెస్ ప్రభుత్వం దరఖాస్తులు స్వీకరిస్తుందని అభ్యంతరం వ్యక్తం చేశారు.