గత సంవత్సరం డిసెంబర్‌లో జరిగిన బల్దియా పోరులో కమలనాథులు 149 స్థానాల్లో పోటీ చేసి 48 స్థానాల్లో విజయం సాధించారు. మేయర్ పీఠాన్ని కైవసం చేసుకునేందుకు ఏ పార్టీకి స్పష్టమైన మెజార్టీ లేదు. తెరాస, భాజపా, మజ్లిస్‌ పోటాపోటీగా సీట్లు సాధించాయి. రేపు జరగబోయే మేయర్ ఎన్నికల్లో భాజపా మేయర్, డిప్యూటీ మేయర్ అభ్యర్థులను పోటీకి దింపుతోంది.
తెరాసకే దాదాపు...
మేయర్ పీఠం కైవసం చేసుకునేందుకు స్పష్టమైన మెజార్టీ లేకపోయినా... అత్యధికంగా సీట్లు సాధించిన తెరాసకు మేయర్ పీఠం దక్కడం దాదాపు ఖాయంగా కనిపిస్తోంది. జీహెచ్ఎంసీ ఎన్నికల సమయంలో తెరాస, మజ్లిస్‌ రహస్య ఒప్పందంతో ముందుకు సాగాయి. ఈ ఎన్నికల్లో ఇరుపార్టీల వైఖరిని బహిర్గతం చేసేందుకు భాజపా వ్యూహాత్మకంగా ముందుకు సాగుతోంది. చివరిక్షణం వరకు తెరాసను అయోమయం చేయాలని కమలనాథులు యోచిస్తున్నారు.
సీల్డ్ కవర్లో...
తెరాసలో మేయర్ స్థానం కోసం పోటీ ఎక్కువగా ఉండటం... సీల్డ్ కవర్లో పేరును పంపిస్తామనడం వల్ల మేయర్ స్థానాన్ని ఆశిస్తున్న వారు అసంతృప్తితో ఉన్నట్లు భాజపా భావిస్తోంది. మేయర్ ఎన్నికలోపు పార్టీ కార్పొరేటర్లు చేజారిపోకుండా ఉండేందుకు ఇప్పటికే సమావేశం నిర్వహించి దిశానిర్దేశం చేశారు.