భాజపా సరికొత్త వ్యూహం.. అధికారమే లక్ష్యం

తెలంగాణలో అధికారమే లక్ష్యంగా కమలనాథులు వ్యూహాత్మకంగా ముందుకు సాగుతున్నారు. దుబ్బాక, జీహెచ్‌ఎంసీ ఎన్నికల్లో మంచి ఫలితాలు సాధించిన కాషాయ దళం రాష్ట్రంలో త్వరలో జరగబోయే పట్టభద్రులు, కార్పొరేషన్లలో సత్తా చాటేందుకు వ్యూహాలు రచిస్తున్నారు. ఇప్పటికే ఎన్నికలు జరగబోయే జిల్లాల్లో భాజపా రాష్ట్ర నాయకత్వం ప్రచారం నిర్వహించింది. ఈ ఎన్నికల్లో విజయమే లక్ష్యంగా బూత్​ నుంచి నియోజకవర్గ స్థాయి వరకు ఇంఛార్జిలను నియమించింది. ఆ పార్టీ రాష్ట్ర వ్యవహారాల ఇంఛార్జి తరుణ్‌ చుగ్‌ రేపు రాష్ట్రానికి రానున్నారు. మూడు రోజుల పాటు ఎన్నికలు జరిగే జిల్లాల్లో పర్యటించి దిశానిర్దేశం చేయనున్నారు.

రాష్ట్రంలో త్వరలో జరగబోయే రెండు పట్టభద్రుల స్థానాలతో పాటు వరంగల్‌, కార్పొరేషన్‌ ఎన్నికల్లో సత్తాచాటి అధికార తెరాసకు తామే ప్రత్యామ్నాయం అనే సంకేతాన్ని ప్రజల్లోకి బలంగా తీసుకెళ్లేందుకు కమళదళం యోచిస్తోంది. ఇప్పటికే క్షేత్రస్థాయిలో కమిటీలతో పాటు సన్నాహాక సమావేశాలతో ప్రచారాన్ని ఉద్ధృతంగా నిర్వహిస్తోంది.

ప్రత్యామ్నాయం తామేనని...

రేపో, మాపో పట్టభద్రుల ఎన్నికల నోటిఫికేషన్‌ వెలువడే అవకాశాలు ఉండడం వల్ల ప్రచారాన్ని మరింత వేగవంతం చేసింది. అందివచ్చిన ప్రతి అంశాన్ని తన వైపు అనుకూలంగా మల్చుకుంటోంది. ఈ ఎన్నికలు తెలంగాణలో 60 నుంచి 70 శాతం వరకు ప్రభావం చూపించే అవకాశం ఉందని భావిస్తోంది. ఈ ఎన్నికల్లో విజయం సాధిస్తే 2023లో జరగబోయే ఎన్నికల్లో తెరాసకు ప్రత్యామ్నాయం భాజపానే సంకేతాన్ని ప్రజల్లోకి వెళ్లేలా చేస్తే అధికారం ఖాయమని అంచనా వేస్తోంది.

విస్తృత ప్రచారం...

ఇప్పటికే రెండు పట్టభద్రుల స్థానాల్లో అభ్యర్థులు విస్తృతంగా ప్రచారం చేస్తున్నారు. వరంగల్‌-నల్గొండ-ఖమ్మం పట్టభద్రుల స్థానం నుంచి పార్టీ రాష్ట్ర ప్రధాన కార్యదర్శి గుజ్జుల ప్రేమేందర్ రెడ్డి, హైదరాబాద్‌-రంగారెడ్డి-మహబూబ్‌నగర్‌ స్థానం నుంచి సిట్టింగ్‌ ఎమ్మెల్సీ రాంచందర్‌ రావు బరిలోకి దిగుతున్నారు. ఇంటింటికి తిరుగుతూ ఓటర్లను ప్రసన్నం చేసుకుంటున్నారు. యువత, నిరుద్యోగులు, ఉద్యోగుల పట్ల తెరాస ప్రభుత్వం అనుసరిస్తోన్న ప్రజా వ్యతిరేక విధానాలను ప్రధానంగా తీసుకెళ్లతూనే కేంద్ర ప్రభుత్వ సంక్షేమ పథకాలను వివరిస్తున్నారు.

గెలుపే లక్ష్యంగా...

విజయమే లక్ష్యంగా ముందుకు సాగుతున్న కమలనాథులు, బూత్‌స్థాయి, శక్తి కేంద్రాలు, మండల, నియోజకవర్గ, జిల్లా స్థాయిలో ఇంఛార్జిలను నియమించి ఎప్పటికప్పుడు ప్రచార సరళిని పరిశీలిస్తున్నారు. జాతీయ, రాష్ట్ర నాయకత్వాల మార్గనిర్దేశనంలో గెలుపే లక్ష్యంగా పనిచేస్తున్నారు. రాష్ట్ర వ్యవహారాల ఇంఛార్జి తరుణ్‌ చుగ్‌, కేంద్రమంత్రి కిషన్‌ రెడ్డి, బండి సంజయ్‌, డీకే అరుణ, మురళీధర్‌రావు, రాంమాధవ్‌తో పాటు ముఖ్య నేతలు పార్టీ పట్టభద్రుల అభ్యర్థులకు మద్దతుగా ప్రచారంలో పాల్గొంటున్నారు.

మూడు రోజుల పర్యటన...

భాజపా రాష్ట్ర వ్యవహారాల ఇంఛార్జి తరుణ్‌ చుగ్‌ మూడు రోజుల పర్యటన నిమిత్తం రేపు రాష్ట్రానికి రానున్నారు. రాజకీయ పరిస్థితులు, పార్టీ బలోపేతం, త్వరలో జరగబోయే ఎన్నికలపై రాష్ట్ర నాయకత్వంతో చర్చించనున్నారు. 6న నాగార్జునసాగర్‌లో పర్యటించనున్నారు. సాగర్ ఉపఎన్నికతో పాటు పట్టభద్రుల ఎన్నికల్లో ప్రభావం చూపించే విధంగా తరుణ్‌ చుగ్‌ పర్యటన ఉంటుందని పార్టీ వర్గాలు తెలిపాయి. 7న మెదక్‌, సిద్దిపేట జిల్లాల కార్యవర్గ సమావేశాల్లో పాల్గొని సిద్దిపేట ఎన్నికలతో పాటు 2023 ఎన్నికలకు సన్నద్ధమయ్యేలా పార్టీ శ్రేణులకు దిశానిర్దేశం చేయనున్నారు.

ఇదీ చదవండి:అర్ధరాత్రి దొంగల బీభత్సం.. తొమ్మిది దుకాణాల్లో చోరీ