ప్రభుత్వ అప్పులు చూస్తే గుండెలు పగిలిపోతున్నాయి: భట్టి విక్రమార్క

Bhatti Vikramarka on Electricity Department White Paper : అసెంబ్లీలో ఉపముఖ్యమంత్రి మల్లు భట్టి విక్రమార్క విద్యుత్‌ శాఖపై విడుదల చేసిన శ్వేతపత్రంపై వాడీ వేడీగా చర్చలు జరిగాయి. భద్రాద్రి పవర్‌ప్లాంట్‌ ఆలస్యం కావడం వల్ల 40 శాతం అదనంగా ప్రభుత్వంపై వ్యయం పెరిగిందని ఆగ్రహం వ్యక్తం చేశారు.

Bhatti Vikramarka on Electricity Department White Paper: ప్రజలకు వాస్తవాలు చెప్పాలని నిర్ణయించుకున్నామని ఉపముఖ్యమంత్రి మల్లు భట్టివిక్రమార్క(Bhatti Vikramarka) అసెంబ్లీ వేదికగా తెలియజేశారు. విద్యుత్‌ సంస్థల ఆస్తులు పెరిగాయనేది అవాస్తవమని అన్నారు. రాష్ట్ర విద్యుత్‌ రంగ సంస్థల(Telangana Electricity Deportment) ఆర్థిక పరిస్థితిపై శ్వేతపత్రం విడుదల చేశారు. ఈ క్రమంలో నాయకుల మధ్య చర్చ జరిగింది. రాష్ట్రం ఏర్పడే నాటికి వ్యవసాయ విద్యుత్‌ కనెక్షన్లు 19.03 లక్షలు ఉన్నాయని, ప్రస్తుతం 28 లక్షలకు చేరాయని భట్టి స్పష్టం చేశారు. ప్రాజెక్టులు, కాలువల నుంచి నీళ్లు వస్తే ఎవరైనా కొత్త బోర్లు వేసుకుంటారా అని ప్రశ్నించారు.

Bhatti Vikramarka on Electricity Department: గత ప్రభుత్వం బొగ్గు లభించే ప్రాంతాల్లో పవర్‌ప్లాంట్‌లు పెట్టలేదని భట్టిఆగ్రహం వ్యక్తం చేశారు. భద్రాద్రి పవర్‌ప్లాంట్‌(Bhadradri Powerplant) ఆలస్యం కావడం వల్ల 40 శాతం అదనంగా ప్రభుత్వంపై వ్యయం పెరిగిందని దీంతో పాటు రూ.10 వేల కోట్ల భారం కూడా పడిందని తెలిపారు. యాదాద్రి, భద్రాద్రి కాకుండా బీఆర్ఎస్‌ ఏవైనా కొత్త ప్రాజెక్టులు నిర్మించిందా అని ప్రశ్నించారు. తమకు కనిపించకుండా బీఆర్ఎస్‌ కొత్త ప్రాజెక్టులు కట్టిందా అని ఎద్దేవా చేశారు. ప్రజలను ఇంకా ఎన్నాళ్లు మోసం చేస్తారని నిలదీశారు.

"విద్యుత్ విషయంలో వాస్తవ పరిస్థితులు ప్రజలకు తెలియాలని శ్వేతపత్రం విడుదల చేశాం. ఈ విషయంలో పలువురు సభ్యులు విలువైన సలహాలు ఇచ్చారు. డిస్కమ్‌ల నష్టాలకు కారణం ఎవరో వివరించాం. గత ప్రభుత్వం అధికారంలోకి వచ్చిన మరుసటి రోజే విద్యుత్‌ సమస్య పరిష్కారం కాలేదు. కాంగ్రెస్‌ చేపట్టిన ప్రాజెక్టులు బీఆర్‌ఎస్‌ ప్రభుత్వం అధికారంలోకి వచ్చే నాటికి పూర్తయ్యాయి. యూపీఏ ప్రభుత్వం తెచ్చిన సంస్కరణల వల్లే విద్యుత్ సమస్య తీరింది."-మల్లు భట్టివిక్రమార్క, ఉపముఖ్యమంత్రి

Telangana Assembly Sessions 2023 : యాదాద్రి, భద్రాద్రి, ఛత్తీస్‌గఢ్‌తో విద్యుత్‌ ఒప్పందంతో కలిపి వచ్చిన విద్యుత్‌ 1000 మెగావాట్లని భట్టి విక్రమార్క తెలిపారు. గత పాలకుల వల్ల విద్యుత్‌రంగంలో రూ.81,560 కోట్లు అప్పులయ్యాయని ఆవేదన వ్యక్తం చేశారు. డిస్కమ్‌లకు చెల్లించాల్సిన బకాయిలు రూ.32,497 కోట్లని వెల్లడించారు. మొత్తం కలిపి రూ.1,14,057 కోట్ల అప్పులు ఉన్నాయని స్పష్టం చేశారు. ఈ అప్పులు చూస్తే గుండెలు పగిలిపోతున్నాయని విచారం వ్యక్తం చేశారు. శ్వేతపత్రం పెట్టి వాస్తవాలు చెబుతామంటే చర్చ లేకుండా చేయాలని చూస్తున్నారని భట్టి మండిపడ్డారు.