Bhatti Vikramarka Fires on Central Government: దేశ తొలి ప్రధాని నెహ్రూను స్ఫూర్తిగా తీసుకుని.. సీఎం కేసీఆర్ అన్ని వర్గాల అభివృద్ధికి పాటుపడాలని సీఎల్పీ నేత భట్టి విక్రమార్క కోరారు. బడ్జెట్‌ సమావేశాల్లో భాగంగా ద్రవ్య వినియమ బిల్లుపై జరిగిన చర్చలో మాట్లాడిన భట్టి.. స్వాతంత్య్రం వచ్చినప్పుడు గడ్డు పరిస్థితులు ఉండేవని గుర్తు చేశారు. నెహ్రూ చర్యలతో దేశం అభివృద్ధి చెందిందని అన్నారు. కేంద్రంలో ప్రస్తుతం ఉన్న ప్రభుత్వం.. పేదల పొట్ట కొట్టి.. పెద్దలకు పెడుతోందని ఆరోపించారు.
పార్టీలకు అతీతంగా తెలంగాణ ఉద్యమంలో అందరూ పోరాడారని సీఎల్పీ నేత భట్టి విక్రమార్క గుర్తు చేశారు. సోనియా గాంధీ ఆలోచించి తెలంగాణ రాష్ట్రాన్ని ఏర్పాటు చేశారని తెలిపారు. ప్రత్యేక తెలంగాణ ఉద్యమం లక్ష్యాల్లో నిరుద్యోగం ఒక పెద్ద సమస్య అని అన్నారు. బడ్జెట్‌ ద్వారా తెలంగాణ ఉద్యమ లక్ష్యాలు నెరవేరాలని పేర్కొన్నారు. ప్రతి మండలంలో 3 కేజీ టూ పీజీ స్కూళ్లు ఏర్పాటు చేయాలని కోరారు.
దేశాన్ని ధనిక, పేద వర్గాలుగా విభజిస్తున్నారు: చేపల అమ్మకం అవుట్ లెట్స్ పరిశుభ్రంగా ఉండాలని భట్టి విక్రమార్క వివరించారు. సర్పంచులకు ప్రభుత్వం బిల్లులు చెల్లించాలని డిమాండ్ చేశారు. దేశ సంపదను మోదీ మిత్రులకు అప్పనంగా పంచిపెడుతున్నారని ఆరోపించారు. దేశాన్ని ధనిక, పేద వర్గాలుగా విభజిస్తున్నారని మండిపడ్డారు. లౌకిక భావాలు కలిగిన నాయకత్వం దేశానికి కావాలని పేర్కొన్నారు. కేంద్ర ప్రభుత్వం కృష్ణా నదీ జలాలను ఎందుకు ఇవ్వడం లేదని ప్రశ్నించారు.