బడ్జెట్లో బీసీలకు ప్రతి ఏటా అన్యాయం జరుగుతోందని బీసీ సంక్షేమ సంఘం జాతీయ అధ్యక్షుడు ఆర్.కృష్ణయ్య ఆరోపించారు. ఈ నెల 7నుంచి ప్రారంభం కానున్న బడ్జెట్ సమావేశాల్లో బీసీలకు అధిక నిధులు కేటాయించాలని డిమాండ్ చేశారు. హైదరాబాద్లోని ఖైరతాబాద్లో బీసీ సంక్షేమ శాఖ మంత్రి గంగుల కమలాకర్కు 14 డిమాండ్లతో కూడిన వినతిపత్రం సమర్పించారు.
రాష్ట్ర బడ్జెట్లో బీసీల సంక్షేమానికి 10 వేల కోట్ల రూపాయలను కేటాయించే విధంగా కృషి చేయాలని మంత్రిని కోరారు. మంత్రితో పలు అంశాలపై చర్చలు జరిపారు. బడ్జెట్లో బీసీ కార్పొరేషన్కు సబ్సిడీ రుణాల కోసం రూ.5 వేల కోట్లు కేటాయించాలని కోరారు. ఎంబీసీ కార్పొరేషన్కు రూ.2 వేల కోట్లు, బీసీ కులాల ఫెడరేషన్లకు రూ.2 వేల కోట్లు కేటాయించాలని డిమాండ్ చేశారు.
నాలుగేళ్ల క్రితం సబ్సిడీ రుణాల కోసం 5 లక్షల 77 వేల మంది కార్పొరేషన్కు దరఖాస్తు చేసుకోగా 40 వేల మందికే రుణాలు ఇచ్చారని తెలిపారు. పెండింగ్లో ఉన్న 5 లక్షల 37 వేల మందికి రుణాలు మంజూరు చేయాలన్నారు. బీసీ గురుకుల పాఠశాలలకు పక్కా భవనాల కోసం నిధులివ్వాలని ఐఐటీ, ఐఐఎం, ఎన్ఐటీ కోర్సులకు పూర్తి ఫీజులు ప్రభుత్వమే చెల్లించాలని మంత్రిని కోరారు. అనంతరం ఇదే డిమాండ్లతో రాష్ట్ర బీసీ కమిషన్ ఛైర్మన్ వకులాభరణం కృష్ణ మోహన్ను కలిశారు.
రాష్ట్రంలో బీసీల సమస్యలపై మంత్రి గుంగుల కమలాకర్తో చర్చించాం. రానున్న బడ్జెట్లో కేటాయింపులు పెంచాలి. బీసీలకు ఎక్కడా రుణాలు ఇవ్వడం లేదు. రుణాల కోసం తిరుగుతున్నా కూడా అతీగతీ లేదు. పెండింగ్లో ఉన్న రుణాలన్నింటినీ విడుదల చేయాలి. బీసీ సంక్షేమానికి రూ.10 వేల కోట్లు కేటాయించాలి. బీసీ కార్పొరేషన్కు రూ.3 వేల కోట్లు ఇవ్వాలి. స్కాలర్షిప్లు, మెస్ ఛార్జీలు కూడా పెంచాలి. ఇంటర్ క్యాస్ట్ మ్యారేజ్ చేసుకునే వారికి రూ.2.5 లక్షలకు పెంచాలి. బీసీ సంక్షేమాల పథకాల మీద ముఖ్యమంత్రి ఒక్కసారైనా సమీక్ష చేశారా?
- ఆర్. కృష్ణయ్య, బీసీ సంక్షేమ సంఘం జాతీయ అధ్యక్షుడు
