తెలంగాణలో 'ఆజాదీ కా అమృత్ మహోత్సవ్' ఉత్సవాలు

దేశానికి స్వాతంత్రం వచ్చి 75 ఏళ్లు పూర్తవుతున్న సందర్భంగా రాష్ట్రంలో ఉత్సవాలను ఘనంగా నిర్వహించాలని ముఖ్యమంత్రి కేసీఆర్ ఆదేశించారు. వేడుకల నిర్వహణకు రూ.25 కోట్లు కేటాయించిన సీఎం.. ప్రభుత్వ సలహాదారు రమణాచారి నేతృత్వంలో కమిటీని ఏర్పాటు చేశారు. హైదరాబాద్‌, వరంగల్‌లో జరిగే ప్రారంభ కార్యక్రమంలో గవర్నర్‌, సీఎం ముఖ్య అతిథులుగా పాల్గొంటారు.

దేశానికి స్వాతంత్రం వచ్చి 75 ఏళ్లు పూర్తవుతున్న వేళ "ఆజాదీ కా అమృత్‌" మహోత్సవాల నిర్వహణపై ప్రధాని నరేంద్ర మోదీ నిర్వహించిన వీడియో కాన్ఫరెన్స్‌లో పాల్గొన్న సీఎం కేసీఆర్... రాష్ట్రంలో ఉత్సవాలపై అధికారులకు దిశానిర్ధేశం చేశారు. ఈ ఉత్సవాలను రాష్ట్రంలోనూ ఘనంగా నిర్వహించాలని పేర్కొన్నారు. ఈ నెల 12 నుంచి వచ్చే ఏడాది ఆగస్టు 15 వరకు 75 వారాలపాటు జరపాలని సూచించారు. ఇందుకు రూ.25 కోట్లు కేటాయిస్తున్నట్లు తెలిపారు. ఉత్సవాల నిర్వహణ కమిటీ ఛైర్మన్‌గా ప్రభుత్వ సలహాదారు కేవీ రమణాచారిని నియమించారు.

ఈనెల 12న ఆరంభ కార్యక్రమం..

ఈ ఉత్సవాల్లో భాగంగా ఈనెల 12న హైదరాబాద్ పబ్లిక్ గార్డెన్స్, వరంగల్ పోలీస్ గ్రౌండ్స్‌లో ఆరంభ కార్యక్రమాలు నిర్వహించాలని సీఎం నిర్ణయించారు. హైదరాబాద్‌లో తాను పాల్గొననున్నట్టు తెలిపారు. వరంగల్‌లో గవర్నర్ తమిళిసై సౌందరరాజన్ ముఖ్య అతిథిగా హాజరవుతారని చెప్పారు. ఉదయం 11 గంటలకు మొదలయ్యే కార్యక్రమంలో జాతీయ పతాకావిష్కరణ, పోలీస్ మార్చ్, దేశభక్తి కార్యక్రమాలు నిర్వహించాలని నిర్ణయించారు. కొవిడ్ నిబంధనలకు అనుగుణంగా కార్యక్రమాలు జరపాలని సీఎం సూచించారు.

దేశభక్తి పెంపొందించే కార్యక్రమాలు...

స్వాతంత్య్ర సమరయోధులు, అమరవీరులను స్మరించుకుని జోహార్లు అర్పించాలని ముఖ్యమంత్రి తెలిపారు. ఈ ఉత్సవాలకు గుర్తుగా సంజీవయ్య పార్క్ తరహాలో రాష్ట్రంలోని 75 ముఖ్యమైన ప్రాంతాల్లో జాతీయ జెండాలను ఎగరేయాలని కేసీఆర్ తెలిపారు. ఈ ఉత్సవాల్లో భాగంగా వివిధ స్థాయిల్లో వ్యాస రచన, ఉపన్యాస, చిత్రలేఖన పోటీలు, కవి సమ్మేళనాలు... దేశభక్తిని పెంచే వేర్వేరు కార్యక్రమాలును నిర్వహించాలని కేసీఆర్ ఆదేశించారు.

ఇదీ చూడండి:పురపాలికల వార్డుల విభజన రీషెడ్యూల్​ చేసిన సర్కారు