'నామినేషన్లు వేయలేకపోయిన వారికి మరో అవకాశం'

ఆంధ్రప్రదేశ్ ఎంపీటీసీ, జడ్పీటీసీ స్థానాలకు నామినేషన్ల విషయంలో ఆ రాష్ట్ర ఈసీ కీలక నిర్ణయం ప్రకటించింది. దౌర్జన్యాలు, బెదిరింపుల కారణంగా నామినేషన్లు వేయలేని వారు, వేధింపుల కారణంగా ఉపసంహరించుకున్న వారికీ అవకాశం కల్పించింది. అభ్యర్థులు తమ వద్ద ఉన్న ఆధారాలతో కలెక్టర్లను కలవాలని సూచించింది.

ఆంధ్రప్రదేశ్​లో దౌర్జన్యాలు, బెదిరింపుల కారణంగా ఎంపీటీసీ, జడ్పీటీసీ స్థానాలకు నామినేషన్లు వేయలేని వారికి, వేధింపుల కారణంగా ఉపసంహరించుకున్నవారికీ ఆ రాష్ట్ర ఎన్నికల సంఘం(ఎస్‌ఈసీ) మరో అవకాశం కల్పిస్తోంది. అభ్యర్థులు తమ వద్ద ఉన్న ఆధారాలతో కలెక్టర్లను కలవాలని సూచించింది. ఈ మేరకు ఆ రాష్ట్ర ఎన్నికల కమిషనర్‌ రమేశ్‌కుమార్‌ గురువారం పత్రికా ప్రకటన విడుదల చేశారు. అదే విధంగా కలెక్టర్లకు పలు సూచనలు చేస్తూ ఆదేశాలు జారీ చేశారు. గతంలో నామినేషన్లు వేసేందుకు వెళ్లినప్పుడు అడ్డుకున్న సమయంలో ఎన్నికల అధికారులకు, పోలీసులకు చేసిన ఫిర్యాదు ప్రతులు, మీడియాలో వచ్చిన వార్తల ఆధారంగా ఫిర్యాదు చేయవచ్చని ఎస్‌ఈసీ సూచించారు. వీటిపై విచారణ చేసి కలెక్టర్లు ఈనెల 20లోగా ఎన్నికల సంఘానికి నివేదికలు పంపితే ఎన్నికల సంఘం పరిశీలించి తదుపరి నిర్ణయం తీసుకుంటుందని ఆయన పేర్కొన్నారు.

బలవంతంగా ఉపసంహరించే నామినేషన్లను తిరిగి పునరుద్ధరించే అధికారం కలెక్టర్లకు కల్పిస్తున్నట్లు ఎన్నికల కమిషనర్‌ స్పష్టం చేశారు. ప్రత్యర్థులు బలవంతం చేయడంతో నామినేషన్లు ఉపసంహరించుకున్నట్లుగా ఎవరైనా తగిన ఆధారాలతో వస్తే అలాంటి నామినేషన్లు పునరుద్ధరించాలని ఎన్నికల కమిషనర్‌ సూచించారు. ఎన్నికలు నిష్పక్షపాతంగా, పారదర్శకంగా నిర్వహించేందుకు ఎన్నికల సంఘం ఈ చర్యలు తీసుకుందని ఎస్‌ఈసీ వివరించారు. ఎన్నికలను సజావుగా నిర్వహించేందుకు ఎన్నికల సంఘం తన అధికారాలన్నీ ఉపయోగించాలని హైకోర్టు కూడా ఇటీవల తీర్పు చెప్పిందని ఆయన పేర్కొన్నారు. పురపాలక, నగరపాలక, నగర పంచాయతీ ఎన్నికల్లోనూ బెదిరింపుల కారణంగా నామినేషన్లు వేయని వారికి తిరిగి అవకాశం కల్పించాలని ఇటీవల ఎన్నికల సంఘం నిర్ణయించిన విషయం తెలిసిందే. మాచర్ల, పులివెందుల, రాయచోటి, పుంగనూరు, పలమనేరు పురపాలక సంఘాల్లో, తిరుపతి నగరపాలక సంస్థలో వార్డులు/డివిజన్లకు దాఖలైన ఏక నామినేషన్ల పైనా పూర్తిస్థాయి నివేదికలు ఇవ్వాలని జిల్లా ఎన్నికల అధికారులను ఆ రాష్ట్ర ఎన్నికల సంఘం కోరింది.

కేంద్ర హోంశాఖ దృష్టికి దౌర్జన్యాలు

ఎంపీటీసీ, జడ్పీటీసీ ఎన్నికల్లో దౌర్జన్యాలను ఎన్నికల సంఘం 2020 మార్చి 18న కేంద్ర హోంశాఖ కార్యదర్శి దృష్టికి తీసుకెళ్లిన విషయాన్ని ఎన్నికల కమిషనర్‌ ప్రస్తావించారు. అక్టోబరు 28న మళ్లీ ఎన్నికల కమిషనర్‌ నిర్వహించిన సమావేశానికి హాజరైన 11 గుర్తింపు, మరో 2 రిజిస్టర్డ్‌ పార్టీల ప్రతినిధులు ఎంపీటీసీ, జడ్పీటీసీ ఎన్నికలు కొత్తగా మళ్లీ నిర్వహించాలని కోరాయని వివరించారు. భారత రాజ్యాంగంలో ఆర్టికల్‌ 243కే ప్రకారం ఎన్నికల సంఘానికి సంక్రమించిన అధికారాలను ఉపయోగించి గతంలో దౌర్జన్యాల కారణంగా నామినేషన్లు వేయలేని వారందరి నుంచి ఫిర్యాదులు స్వీకరించి తదుపరి నిర్ణయం తీసుకోనున్నట్లు ఎస్‌ఈసీ ప్రకటించారు. కలెక్టర్లు ఫిర్యాదులు స్వీకరించేలా అధికారాలు కల్పించినట్లు వివరించారు.

దౌర్జన్యాలపై వైకాపాయేతర పార్టీలన్నీ ఫిర్యాదు

ఎంపీటీసీ, జడ్పీటీసీ ఎన్నికల్లో ఇతర పార్టీలకు చెందినవారు నామినేషన్లు వేయకుండా అధికార పార్టీ నాయకులు భౌతిక దాడులకు, దౌర్జన్యాలకు పాల్పడినట్లు వైకాపాయేతర పార్టీలన్నీ ఇదివరకే ఎన్నికల సంఘానికి ఫిర్యాదు చేసిన విషయాన్ని తన ఆదేశాల్లో ఎస్‌ఈసీ పేర్కొన్నారు. గుంటూరు, ప్రకాశం, నెల్లూరు, చిత్తూరు, కడప, కర్నూలు జిల్లాల్లో భారీగా, ఏకపక్షంగా ఏకగ్రీవాలు జరిగాయని ఆరోపిస్తూ వాటిపై విచారణ చేయించాలని ఆ పక్షాలు కోరాయని వివరించారు. ఎంపీటీసీ, జడ్పీటీసీలకు ఇది వరకు ఇచ్చిన ఎన్నికల నోటిఫికేషన్‌ రద్దు చేసి మరోసారి నామినేషన్లు స్వీకరించేందుకు కొత్త నోటిఫికేషన్‌ జారీ చేయాలని నాయకులు విజ్ఞప్తి చేసినట్లు ఎస్‌ఈసీ పేర్కొన్నారు.

• ఇదీ చదవండి:ఆ వీడియో క్లిప్పింగ్‌లు చట్టప్రకారం సాక్ష్యాలుగా పనికొస్తాయా?