మస్కట్ నుంచి 10నే వచ్చింది కానీ ఇప్పటికీ ఇంటికి రాలేదు!

భర్తను చూసేందుకు మస్కట్​కు వెళ్లింది ఆ మహిళ. తిరిగి హైదరాబాద్​కు ఈ నెల 10న చేరుకుంది. తనను రిసీవ్​ చేసుకునే తమ్ముడు కాస్త ఆలస్యంగా రాగా... ఎయిర్​పోర్టు బయటకు వెళ్లింది. మరి అటు నుంచి ఎక్కడి వెళ్లింది... ఏమైంపోయింది... అన్నది మాత్రం తెలియదు. ఇంటికి మాత్రం ఇప్పటికీ రాలేదు...!

మస్కట్ నుంచి హైదరాబాద్​కు వచ్చిన లక్ష్మీభవాని (23) అనే వివాహిత శంషాబాద్​ ఎయిర్​పోర్టులో అదృశ్యమైన విషయం ఆలస్యంగా వెలుగులోకి వచ్చింది. ఆంధ్రప్రదేశ్​ తూర్పుగోదావరి జిల్లా కు చెందిన లక్ష్మీభవాని... మస్కట్​లో పనిచేస్తున్న తన భర్తను చూసేందుకు విజిటింగ్​ వీసాపై వెళ్లింది. ఈ నెల 9న బయలుదేరి 10న శంషాబాద్​ ఎయిర్​పోర్టుకు చేరుకుంది. ఇంటికి తీసుకెళ్లేందుకు తన తమ్ముడు కొంత ఆలస్యంగా వచ్చాడు. తన అక్క కన్పించకపోవటం వల్ల ఇంటికి వెళ్లిపోయిందేమోనని భావించాడు. ఇంటికి కూడా రాకపోవటం వల్ల అన్ని చోట్ల వెతికారు. ఎంతకీ లాభం లేకపోగా... ఎయిప్​పోర్టు పోలీసులకు ఫిర్యాదు చేశారు. కేసు నమోదు చేసుకున్న పోలీసులు సీసీటీవీ దృశ్యాలను పరిశీలించారు. విమానాశ్రయంలో దిగిన లక్ష్మీభవాని... బయటకు వచ్చినట్టు దృశ్యాలున్నాయని పోలీసులు తెలిపారు. అక్కడి నుంచి ఎటు వెళ్లిందన్న విషయంపై పోలీసులు దర్యాప్తు చేపట్టారు.

ఇవీచూడండి: జీతాల చెల్లింపునకు నిధుల్లేవు: ఆర్టీసీ యాజమాన్యం