రూ.3 వేల కోట్ల రుణ సమీకరణకు ఏపీ సర్కార్ నిర్ణయం

ఉద్యోగులకు జీతాల చెల్లింపులు, పథకాలకు నిధులు ఇలా అన్ని అవసరాలకూ ఆంధ్రప్రదేశ్​ రాష్ట్ర అభివృద్ధి కార్పొరేషన్ ​(ఎస్​డీసీ)ను ఏపీ ప్రభుత్వం ఆసరాగా మార్చుకుంటోంది. దీని ద్వారా మరో మూడు వేల కోట్ల రూపాయల్ని రుణంగా సమీకరించాలని నిర్ణయించారు. ఎస్​డీసీ ద్వారా వేల కోట్ల రూపాయల అప్పులు తెస్తుండటం ఆర్థికశాఖను ఆందోళనలోకి నెడుతోంది.

ఏపీ అప్పుల ఊబిలోకి వెళ్తున్నా.. రుణాల విషయంలో ప్రభుత్వం వెనక్కి తగ్గట్లేదు. సుస్థిరాభివృద్ధి లక్ష్యాలు, సంక్షేమ పథకాల అమలు కోసం ఏర్పాటు చేసిన రాష్ట్ర అభివృద్ధి కార్పొరేషన్(ఎస్​డీసీ) ద్వారా మరో మూడు వేల కోట్ల రూపాయలను సేకరించాలని ఏపీ ప్రభుత్వం నిర్ణయించింది. ఈ మొత్తాన్ని స్టేట్ బ్యాంక్ ఆఫ్ ఇండియా(ఎస్​బీఐ) నుంచి రుణంగా తీసుకోనున్నారు. ఇప్పటికే రూ. 10 వేల కోట్లను ఎస్​డీసీ ద్వారా రాష్ట్ర ప్రభుత్వం రుణ సమీకరణ చేసింది.

ఆర్థిక శాఖ ఆందోళన..

మొత్తంగా రూ. 25 వేల మేర ఆర్థిక వనరుల్ని సమీకరించటం లక్ష్యంగా ఎస్​డీసీ ఏర్పాటైంది. అవసరమైనంత మేర సంక్షేమ, అభివృద్ధి కార్యక్రమాలు అమలు చేయాల్సి ఉంది. ఈ కార్పొరేషన్​కు ఎస్​బీఐ ఇప్పటికే రూ. 6 వేల కోట్ల రుణాన్ని ఇచ్చింది. అలాగే మరో రూ. 4 వేల కోట్ల రుణాన్ని కెనరా బ్యాంక్, పంజాబ్ నేషనల్ బ్యాంకులు సమకూర్చాయి. ఇప్పుడు తాజాగా మరో రూ. 3 వేల కోట్లను ఎస్​బీఐ నుంచి రుణంగా తీసుకోవాలని నిర్ణయించారు. అయితే ఈ సంస్థ ఏర్పాటైన ఏడాదిలోపే ఇన్ని వేల కోట్ల రూపాయలను రుణంగా తీసుకోవటంపై ఆర్థిక శాఖలో ఆందోళన మొదలైంది.

నిధుల వినియోగం ఇలా
ఎస్​డీసీ సమీకరించిన ఆర్థిక వనరుల నుంచి ఉద్యోగుల జీతాలతో పాటు కరోనా కారణంగా పెండింగ్​లో ఉంచిన రూ. 4,300 కోట్ల జీతాల బకాయిలు చెల్లింపులు చేస్తున్నారు. అలాగే ప్రభుత్వం ప్రకటించిన డీఏ బకాయిలను కూడా 2021 జనవరి నుంచి ఈ నిధుల నుంచే చెల్లించనున్నారు. ఇక జనవరి 9 తేదీన అమ్మ ఒడి పథకం కింద రూ. 6,100 కోట్లను కూడా ఈ కార్పొరేషన్ నిధుల నుంచే సర్దుబాటు చేయాలని ప్రభుత్వం భావిస్తోంది.

ప్రస్తుతం నెల వారీగా ప్రభుత్వ ఆదాయం రూ. 11 వేల కోట్లైతే కేంద్రం నుంచి వచ్చే మరో రూ. 3 వేల కోట్లతో కలిపి రూ. 14 వేల కోట్ల మొత్తాన్ని ఖర్చులకు, పథకాలకు సర్దుబాట్లు చేయాల్సిన పరిస్థితి ఏర్పడింది.

ఇదీ చూడండి: నేరస్థుల పాలిట సింహ స్వప్నంగా రాచకొండ కమిషనరేట్​