ఆంధ్రప్రదేశ్లో వైఎస్సార్‌ రైతు భరోసా రెండో విడత నిధులను మంగళవారం ఏపీ సీఎం జగన్ విడుదల చేశారు. మొత్తం 50.07 లక్షల మంది రైతుల ఖాతాలకు రూ.1,114 కోట్లు జమ చేస్తున్నామన్నారు. 50 లక్షల కుటుంబాలకు మేలు జరుగుతుందంటే సంతోషంగా ఉందన్నారు. 41,000 అటవీ భూముల సాగుదార్లకు కూడా సాయం అందిస్తున్నామన్నారు. ఆ రాష్ట్రంలోని ప్రతి 3 కుటుంబాల్లో ఒక కుటుంబానికి సహాయం అందుతోందన్నారు. నష్టపోయిన వ్యవసాయ, ఉద్యాన పంటలకు రూ.135 కోట్ల పెట్టుబడి రాయితీ కల్పించనున్నట్లు జగన్ తెలిపారు.
"రైతు భరోసా రెండో విడతలో రైతులకు రూ.2వేలు చొప్పున ఇస్తున్నాం. అక్టోబరు 2న ఆర్‌ఓఎఫ్‌ఆర్‌ పట్టాలు అందించిన గిరిజనులకూ ఈ పథకాన్ని వర్తింపజేస్తూ రూ.11,500 చొప్పున జమ చేస్తున్నాం. జూన్ నుంచి ఆగస్టు వరకు నష్టపోయిన రైతులకు ఇవాళే సాయం అందిస్తున్నాం. జూన్ నుంచి ఆగస్టు వరకు నష్టపోయిన రైతులకు మంగళవారం సాయం అందిస్తామని.. సెప్టెంబర్, అక్టోబర్‌లో పంట నష్టపోయిన రైతులకు నవంబర్‌లోపే పరిహారం చెల్లిస్తాం. రైతుకు అండగా ఉండేందుకు 10 వేల 641 గ్రామాల్లో ఆర్బీకేలు ఏర్పాటు చేస్తున్నాం. వైకాపా అధికారంలోకి వచ్చాక రూ.8వేల 655 కోట్ల విద్యుత్‌ బకాయిలు చెల్లించాం."