గ్రేటర్​లో మరో 45 బస్తీ దవాఖానాలు ప్రారంభం

చిన్న జబ్బు వచ్చిందంటే చాలు ఆసుపత్రులకు వేలాది రూపాయలు ఖర్చు చేయాల్సిందే. ప్రతి చిన్న రోగానికి పెద్దాస్పత్రులకు వెళ్లడం... అటు వైద్య సిబ్బందికి, ఇటు రోగులకు ఇబ్బందికరమే. అందుకే గ్రేటర్​ పరిధిలో మరో 45 బస్తీ దవాఖానాలను ప్రభుత్వం ప్రారంభించింది.

గ్రేటర్​ హైదరాబాద్​ పరిధిలో మరో 45 బస్తీ దవాఖానాలను ప్రభుత్వం ప్రారంభించింది. హైదరాబాద్​ పరిధిలో 22, మేడ్చల్​ మల్కాజిగిరి జిల్లాలో 15, రంగారెడ్డి జిల్లాలో 5, సంగారెడ్డి జిల్లాలో 3 బస్తీ దవాఖానాలను ఆయా పరిధి ఎమ్మెల్యేలు, మంత్రులు, అధికారులు ప్రారంభించారు.

ప్రస్తుతం గ్రేటర్​ పరిధిలో 123 బస్తీ దవాఖానాలు ఉన్నాయి. ప్రతిరోజు 10వేల మందికి వైద్య సేవలు అందిస్తున్నాయి. కొత్తగా ప్రారంభమైన 45 దవాఖానాలతో అదనంగా 4వేల మందికి వైద్య సేవలు అందనున్నాయి. ఒక్కో బస్తీ దవాఖానాలో.. ఒక వైద్యుడు ఒక నర్స్‌, ఒక సహాయకుడు ఉండనున్నారు.

సికింద్రాబాద్​లోని చేపలబావి, నాలా బజార్​ ప్రాంతాల్లోని బస్తీ దవాఖానాలను మంత్రి తలసాని శ్రీనివాస్​ యాదవ్​ ప్రారంభించారు. పేద, మధ్య తరగతి వర్గాల ప్రజలకు ఈ ఆసుపత్రులు ఎంతగానో ఉపయోగపడుతాయని పేర్కొన్నారు.

కుత్బుల్లాపూర్​లోని చింతల్​ భగత్​ సింగ్​ నగర్​లో బస్తీ దవాఖానాను మంత్రి మల్లారెడ్డి ప్రారంభించారు. ద్వారక నగర్​లో ఎమ్మెల్యే వివేక్​, కవాడిగూడలోని రోజ్​ కాలనీలోని ఆసుపత్రులను ఉపసభాపతి పద్మారావు గౌడ్​, ఎమ్మెల్యే ముఠాగోపాల్​ ప్రారంభించారు.

మేడ్చల్ జిల్లా కుషాయిగూడలో బస్తీ దవాఖానాను మేయర్​ బొంతు రామ్మోహన్ ప్రారంభించారు. పేద ప్రజలకు ఈ ఆసుపత్రులు మేలు చేస్తాయని చెప్పారు.

ఇదీ చదవండి:వలస కష్టం: మండుటెండలో గర్భిణి నడక