కృష్ణా పరివాహక ప్రాజెక్టులకు వరద తాకిడి ప్రారంభమైంది. మహారాష్ట్ర, కర్ణాటక ఎగువ ప్రాంతాల్లో అధిక వర్షాలు కురుస్తుండటం వల్ల ప్రస్తుతం ఆల్మట్టి నుంచి వరద నీరు వచ్చి చేరుతోంది. ఆల్మట్టికి సగటున 50 వేల క్యూసెక్కుల నీరు వచ్చి చేరుతుండగా..10 వేల క్యూసెక్కులను దిగువకు విడుదల చేస్తున్నారు. ఆల్మట్టి పూర్తి స్థాయి నీటిమట్టం 1705 అడుగులు కాగా.. నీటి నిల్వ సామర్థ్యం 129 టీఎంసీలు. ప్రస్తుతం ఆల్మట్టిలో 1694 అడుగుల నీరుండగా.. 82 టీఎంసీల నీటి నిల్వ కొనసాగుతోంది. గతేడాది ఈ సమయానికి ఆల్మట్టిలో కేవలం 46 టీఎంసీలు మాత్రమే ఉన్నాయి. వరద ఉద్ధృతి ఇలాగే కొనసాగినా.. పెరిగినా నెలరోజుల్లో పూర్తిగా నిండి దిగువకు నీళ్లు విడుదల చేసే అవకాశం ఉంది.
నారాయణపూర్ జలశాయం
- నారాయణపూర్ జలాశయానికి ప్రస్తుతం ఆల్మట్టి నుంచి సగటున 10 వేల క్యూసెక్కుల వరద నీరు వచ్చి చేరుతోంది.
- జలశాయం పూర్తి స్థాయి నీటి మట్టం 1615 అడుగులు కాగా.. నీటి నిల్వ సామర్థ్యం 37.64 టీఎంసీలు.
- ప్రస్తుతం ఈ జలశాయంలో 1605 అడుగుల వరకు నీళ్లున్నాయి. 25 టీఎంసీల నీటి నిల్వ ఉంది.
- గత ఏడాది ఇదే సమయానికి నారాయణపూర్ జలాశయంలో కేవలం 19 టీఎంసీల నీటినిల్వ మాత్రమే ఉంది.
- దిగువకు ఎలాంటి వరద నీటిని ప్రస్తుతానికి విడుదల చేయడం లేదు.
- మరో 11 టీఎంసీల ప్రవాహం నారాయణపూర్కు చేరితే జూరాలకు నీళ్లు విడుదల చేసే అవకాశం ఉంది.
జూరాల పరిస్థితి
- ప్రస్తుతానికి జూరాలకు కృష్ణా పరివాహక ప్రాంతాల్లో కురుస్తున్న వర్షాల కారణంగా కేవలం 2 వేల577 క్యూసెక్కుల ఇన్ ఫ్లో మాత్రమే వస్తోంది.
- జూరాల పూర్తిస్థాయి నీటిమట్టం 1045 అడుగులు కాగా.. నీటి నిల్వ సామర్థ్యం 9.65 టీఎంసీలు.
- ప్రస్తుతం జూరాలలో 1041 అడుగుల మట్టంలో, 7.80 టీఎంసీల నీటి నిల్వ కొనసాగుతోంది.
- గత ఏడాది ఇదే సమయానికి జూరాలలో కేవలం 1.96 టీఎంసీల నీటి నిల్వ మాత్రమే ఉంది.
- జూన్ మొదలుకుని ఇప్పటి వరకూ జూరాలకు 3.94 టీఎంసీల నీళ్లు వచ్చి చేరాయి.