Alampur MLA Abraham Joins Congress : తెలంగాణలో ఎన్నికలకు సమయం (Telangana Assembly Elections) సమీపిస్తున్న కొద్దీ.. పార్టీలు ప్రచారంలో దూకుడు పెంచాయి. ఓవైపు సభలు, సమావేశాలతో నేతలు.. మరోవైపు ఇంటింటి ప్రచారాలతో అభ్యర్థులు ఓట్ల వేటలో పడ్డారు. ఈ నేపథ్యంలో వివిధ పార్టీల్లోని అసమ్మతి నేతలను తమవైపు తిప్పుకునేందుకు ఆరాటపడుతున్నారు. ఎవరైనా అసమ్మతి రాగం వినిపిస్తున్నారని తెలిస్తే చాలు.. వారిని పార్టీలోకి చేర్చుకునేందుకు పోటీ పడుతున్నారు.
MLA Abraham Left BRS Joined in Congress : ఎలాగైనా గెలవాలనే తపనతో ఉన్న పార్టీలు ఏ అవకాశాన్ని జార విడుచుకోవడం లేదు. తాజాగా అధికార బీఆర్ఎస్‌కు షాక్ తగిలింది. జోగులాంబ గద్వాల జిల్లా అలంపూర్ ఎమ్మెల్యే అబ్రహం (MLA Abraham).. కాంగ్రెస్‌లో చేరారు. హైదరాబాద్‌లో పీసీసీ అధ్యక్షుడు రేవంత్‌రెడ్డి ఆయనకు పార్టీ కండువా కప్పి హస్తం పార్టీలోకి ఆహ్వానించారు. ప్రస్తుతం అబ్రహం అలంపూర్ ఎమ్మెల్యేగా కొనసాగుతున్నారు. కానీ ఈసారి గులాబీ పార్టీ టికెట్ దక్కలేదు.
ఎన్నికలు సమీపిస్తున్న వేళ ప్రచార జోరు - మేనిఫెస్టో వివరిస్తూ ఓట్లు అభ్యర్థిస్తున్న నేతలు
అయితే ముఖ్యమంత్రి కేసీఆర్ ( CM KCR) ఆగస్ట్ 21న.. ప్రస్తుత ఎమ్మెల్యే అబ్రహంకే టికెట్ ఇస్తున్నట్లు ప్రకటించారు. కానీ దీనిని ఆ జిల్లా బీఆర్ఎస్ నాయకుడు, ఎమ్మెల్సీ చల్లా వెంకట్రామిరెడ్డి.. వ్యతిరేకిస్తూ వచ్చారు. చల్లా.. తన అనుచరుల్లో ఒకరైన విజయుడికి అవకాశం కల్పించాలని సీఎంను కోరారు. మరోవైపు అబ్రహంకే టికెట్ ఇవ్వాలని ఆయన అభిమానులు, కార్యకర్తలు నిరసనలు చేపట్టారు. పలు సందర్భాల్లో అబ్రహం కూడా మంత్రులు కేటీఆర్‌, హరీశ్‌రావులను కలిసి ఇదే విషయాన్ని విన్నవించారు. కానీ చివరికి విజయుడికే.. బీఆర్ఎస్ టికెట్‌ను కేసీఆర్ ఖరారు చేశారు.