హైదరాబాద్ హిమాయత్నగర్లో ఏఐఎస్ఎఫ్, ఏఐవైఎఫ్ల ఆధ్వర్యంలో నిర్వహించ తలపెట్టిన ర్యాలీని పోలీసులు అడ్డుకున్నారు. ఏఐటీయూసీ భవన్ నుంచి బైక్ ర్యాలీ ప్రారంభించగా పోలీసులు అనుమతించలేదు. ఈక్రమంలో నాయకులు, పోలీసులకు మధ్య వాగ్వాదం చోటుచేసుకుంది. నేతలను పోలీసులు అరెస్టు చేసి పోలీస్ స్టేషన్కు తరలించారు. పోలీసులకు వ్యతిరేకంగా శ్రేణులు భారీగా నినాదాలు చేశారు.
కార్పొరేట్ శక్తుల కోసమే చట్టాలు...
మోదీ సర్కారు ప్రజా వ్యతిరేక పాలన సాగిస్తోందని ఏఐఎస్ఎఫ్ రాష్ట్ర ప్రధాన కార్యదర్శి రావి శివరామకృష్ణ అన్నారు. కార్పొరేట్ శక్తుల సూచనల మేరకే, వారికి లబ్ధి చేకూర్చేందుకే వ్యవసాయ చట్టాలు రూపొందించారని ఆరోపించారు. దిల్లీలో రైతుల దీక్ష చేస్తున్నా.. ప్రభుత్వం పట్టించుకోకపోవడం సరికాదన్నారు. చలిలో వణుకుతూ రైతులు దీక్షలు చేస్తుంటే.. కొందరు భాజపా నేతలు ఆ ఉద్యమం గురించి అనుచిత వ్యాఖ్యలు చేయడాన్ని ఆయన తీవ్రంగా ఖండించారు. సాగు చట్టాలు రద్దు చేసేవరకూ పోరాడుతామని చెప్పారు. దిల్లీలో రైతులు దీక్ష విరమించేవరకూ మద్దతుగా నిలుస్తామని భరోసానిచ్చారు.
ఇదీ చదవండి:ట్రాలీఆటో బోల్తా... 18 మందికి గాయాలు