Tollywood Drugs Case: నటి రకుల్‌ను 6 గంటలుగా విచారిస్తున్న ఈడీ అధికారులు

టాలీవుడ్​ డ్రగ్స్​ కేసు(Tollywood Drugs Case)లో ఈడీ(ED) విచారణ ముమ్మరంగా సాగుతోంది. అబ్కారీ శాఖ సిట్​ నుంచి కేసు వివరాలు సేకరించిన ఈడీ.. నిర్దేశించిన తేదీల ప్రకారం ఆరోపణలు ఎదుర్కొంటున్న సినీ ప్రముఖులను విచారిస్తోంది. ఈ రోజు నటి రకుల్​ ప్రీత్​ సింగ్(Rakul preet singh)​ను ఈడీ అధికారులు విచారిస్తున్నారు.

తెలుగు సినీ పరిశ్రమలో సంచలనంగా మారిన మాదకద్రవ్యాల(Tollywood Drugs Case) కేసులో ఎన్‌ఫోర్స్‌మెంట్‌ డైరెక్టరేట్‌(ఈడీ) విచారణ ముమ్మరంగా కొనసాగుతోంది. ఇప్పటికే దర్శకుడు పూరీ జగన్నాథ్‌, నటి ఛార్మిలను సుదీర్ఘంగా విచారించిన ఈడీ(ED) అధికారులు ప్రముఖ నటి రకుల్‌ప్రీత్‌ సింగ్‌(Rakul preet singh)ను ప్రశ్నిస్తున్నారు. విచారణ నిమిత్తం రకుల్‌.. జూబ్లీహిల్స్​లోని తన నివాసం నుంచి ఈడీ కార్యాలయానికి వచ్చారు. రకుల్​ను ఈడీ అధికారులు ఆరు గంటలుగా విచారిస్తున్నారు.

మనీ లాండరింగ్‌ కోణంలో ఆమె బ్యాంక్‌ ఖాతాలను అధికారులు పరిశీలిస్తున్నారు. ఆమె వ్యక్తిగత లావాదేవీలపై ఈడీ అధికారులు ఆరా తీస్తున్నట్లు సమాచారం. ఎఫ్‌ క్లబ్‌ నుంచి డ్రగ్స్‌ సరఫరా అయినట్లు కెల్వీన్‌ ఇచ్చిన సమాచారంతో ఈడీ రకుల్‌కు నోటీసులు జారీ చేసింది. డ్రగ్స్‌ సప్లై, ఎఫ్‌ క్లబ్‌ ఆర్థిక వ్యవహారాలు తదితర అంశాలపై ఈడీ అధికారులు రకుల్‌ను ప్రశ్నించే అవకాశం ఉంది.

డ్రగ్స్‌ కేసులో మనీ లాండరింగ్ చట్టం కింద సినీరంగానికి చెందిన 12 మందికి ఈడీ ఇటీవల నోటీసులు జారీ చేసిన విషయం తెలిసిందే. ఇందులో భాగంగా రకుల్‌ప్రీత్‌ సింగ్‌ ఆరో తేదీన ఈడీ ఎదుట హాజరు కావాల్సి ఉంది. అయితే, షూటింగ్స్‌ ఉండటంచేత తాను హాజరు కాలేకపోతున్నానని.. కాస్త గడువు ఇవ్వాలని ఈడీ అధికారులను రకుల్‌ కోరారు. అందుకు అంగీకరించని అధికారులు.. మూడు రోజుల ముందుగానే విచారణ చేసేందుకు రంగం సిద్ధం చేశారు. ఇందులో భాగంగా ఆమె ముందుగానే ఈడీ ఎదుట హాజరయ్యారు. ఈనెల 8న రానా ఈడీ విచారణకు రానున్నారు.

ఇదీ చదవండి:DRUNK AND DRIVE: మద్యం సేవించి రోడ్డెక్కుతున్నారా.?.. అయితే మీ లైసెన్స్​ రద్దే!