Srikalahasti viral video: ఓ ప్రేమ జంట తొమ్మిది నెలల కిందట కన్పించకుండా పోయింది. వారి స్వగ్రామాలకు సమీపంలో ఇటీవల ఓ మహిళ, పురుషుడి మృతదేహాలు బయటపడ్డాయి. చనిపోయింది ఆ యువతీ యువకుడేనని వారి కుటుంబసభ్యులు భావించారు. అనుమానాలతో పోలీసులు మృతదేహాలను మార్చురీలకు తరలించారు. ఇంతలో తామిద్దరం భద్రంగా ఉన్నామంటూ ప్రేమజంట సామాజిక మాధ్యమాల్లో వీడియో పోస్టు చేయడం ఆంధ్రప్రదేశ్ తిరుపతి జిల్లా శ్రీకాళహస్తిలో చర్చనీయాంశమైంది.
శ్రీకాళహస్తి పట్టణంలోని ఎన్టీఆర్‌నగర్‌కు చెందిన ఠాగూర్‌, లలితల కుమార్తె చంద్రిత, శ్రీకాళహస్తి మండలం రామాపురానికి చెందిన చంద్రశేఖర్‌ ప్రేమించుకున్నారు. వాలంటీరుగా పనిచేసే చంద్రశేఖర్‌ అప్పటికే వివాహితుడు కాగా, ఓ బాబు సంతానం. ఈ ఏడాది జనవరి 10న వీరు ఇళ్లు వదిలి వెళ్లిపోయారు. కేవీబీపురం మండలం కోవనూరు సమీపంలో తెలుగుగంగ కాల్వలో ఈ నెల 20న బాగా ఉబ్బినస్థితిలో గుర్తు తెలియని యువతి శవం కొట్టుకొచ్చింది. మృతదేహంపై పుట్టుమచ్చలను బట్టి చంద్రిత తల్లిదండ్రులు.. తమ కుమార్తెనేనని స్పష్టంచేశారు.
తమ బిడ్డ చావుకు కారణమైన చంద్రశేఖర్‌ను శిక్షించాలంటూ డిమాండ్‌ చేయగా.. వారికి అండగా తెదేపా, జనసేన నేతలు పోలీస్స్టేషన్ల వద్ద రెండు రోజులు ధర్నాలు చేశారు. ఇంతలో ఏర్పేడు మండలం అంజిమేడు సమీపంలోని బండమానుకాల్వ వద్ద ఈ నెల 22న ఓ యువకుడి మృతదేహం బయటపడింది. పోలీసులు చంద్రశేఖర్‌ కుటుంబ సభ్యులకు సమాచారమివ్వగా.. వారు చూసేందుకు రాలేదు. చంద్రిత తల్లిదండ్రులను పిలిపించగా.. ఆ మృతదేహం చంద్రశేఖర్‌ దేనని చెప్పారు.