ఎమ్మెల్యే కోటా తప్ప మిగతా..... స్థానిక సంస్థలు, ఉపాధ్యాయ, పట్టభద్రుల స్థానాలపై గులాబీ దళపతి ప్రత్యేక దృష్టి సారించినట్లు సమాచారం. ఇప్పటికే ఈ నియోజకవర్గాల్లో ఆశావహులు ఓటర్లను ప్రసన్నం చేసుకునే పనిలో నిమగ్నమయ్యారు. పలు ఉపాధ్యాయ సంఘాలు తమ అభ్యర్థులను ప్రకటించి, ప్రచార రంగలోకి దింపారు. ప్రతిపక్ష పార్టీల్లో వీటి ఊసే లేదు.
ఈ సమరంలో గవర్నర్, ఎమ్మెల్యే కోటాలో అధిక భాగం స్థానాలు అధికార పార్టీ వశం కావడం ఖాయం. అసెంబ్లీలో సుమారు 90 మంది ఎమ్మెల్యేలు ఉండటమే కారణం. గత ఎన్నికల్లో అవకాశం రానివారితో పాటు తాజా మాజీలు మరోసారి అవకాశం కోసం పోటీ పడుతున్నారు. మహమూద్ అలీ, మండలి ఛైర్మన్ స్వామిగౌడ్, చీఫ్ విప్ పాతూరి సుధాకర్ రెడ్డిల పదవీ కాలం మార్చితో ముగియనుంది. మహమూద్ అలీకి హోంశాఖ కేటాయించడంతో ఆయన బెర్తు ఖరారైనట్లే. మండలి ఛైర్మన్ గత ఎన్నికల్లో రాజేందర్నగర్ సీటు ఆశించినా... ఫలితం దక్కలేదు. ఈ విషయంలో ఆయన కొంత అలకబూనారనే వార్తలూ వచ్చాయి. ఎన్నికల సమయంలో పార్టీలో చేరిన పలువురి నేతలకు గులాబీ బాస్ మండలిలో అవకాశం కల్పిస్తానని హామీ ఇచ్చినట్టు తెలుస్తోంది. అందరు ఎమ్మెల్యే కోటా వైపు చూడడం తలనొప్పిగా మారిందనే వాదన గట్టిగా వినిపిస్తోంది. అసెంబ్లీ , గ్రామ పంచాయతీ ఎన్నికల మాదిరిగానే.... మండలిలోనూ కారు హవా కొనసాగించాలనే ఉద్దేశంతో అభ్యర్థుల ఎంపిక విషయంలో కేసీఆర్ ఆచితూచి వ్యవహరిస్తున్నారు.
ఉద్యమ సమయంలో తెరాసకు ఉద్యోగ, ఉపాధ్యాయ సంఘాలు అండగా ఉన్నాయి. వీరి విషయంలో పాత వారికే మరోసారి అవకాశం కల్పిస్తారా లేదా అనేది ఉత్కంఠగా మారింది. మెదక్, ఆదిలాబాద్, నిజామాబాద్, కరీంనగర్ పట్టభద్రుల స్థానం నుంచి మాజీ ఎమ్మెల్సీ సత్యనారాయణ, కరీంనగర్ మేయర్ సర్దార్ రవీందర్ సింగ్, గ్రూపు-1 అధికారుల సంఘం అధ్యక్షుడు చంద్రశేఖర్ గౌడ్, సరోజిని కంటి ఆసుపత్రి మాజీ సూపరింటెండెంట్ రవీందర్ గౌడ్ తీవ్రంగా పోటీ పడుతున్నారు.
వరంగల్ , రంగారెడ్డి, హైదరాబాద్, నిజామాబాద్, నల్గొండ జిల్లాల్లో స్థానిక సంస్థల ఎన్నికలు జరగాల్సి ఉంది. గవర్నర్, ఎమ్మెల్యే, స్థానిక సంస్థల కోటా నుంచి శేరి సుభాష్ రెడ్డి, దేశపతి శ్రీనివాస్, మధుసుదనాచారి, గుత్తా సుఖేందర్ రెడ్డి, మాజీ మంత్రి పట్నం మహేందర్ రెడ్డి, కేఆర్ సురేష్ రెడ్డి, పోచంపల్లి శ్రీనివాస్ రెడ్డి, తేరా చిన్నపరెడ్డి, జాగృతి నేత మేడే రాజీవ్ సాగర్తో పాటు ఇటీవల అసెంబ్లీ ఎన్నికల్లో ఓడిపోయిన పలువురు అభ్యర్థులు ఆశావహులుగా ఉన్నట్టు చర్చ జోరుగా సాగుతోంది.