మృత్యు గడప : ఆనందఖని టు రాంపూర్‌ రహదారి

అధిక ట్రిప్పులు సాధించాలనే బొగ్గు లారీ డ్రైవర్ల ఆరాటం.. మితిమీరిన వేగం.. రహదారి నిర్మాణం, నిర్వహణలో లోపాలు.. వెరసి కొత్తగూడెం-విజయవాడ రహదారిపైనున్న పెనగడప నిత్యం రక్తసిక్తమవుతోంది. ఆనందఖని నుంచి రాంపూర్‌ వరకు ఈ రహదారిపై ప్రయాణం.. ఓ మృత్యు పోరాటాన్ని తలపిస్తోంది. ఇరుకు రహదారి నుంచి నాలుగు వరుసలుగా విస్తరించినా ప్రమాదాల సంఖ్య తగ్గడం లేదు. దీనికి కారణం ఇటుగా దూసుకెళ్లే బొగ్గు లారీలేనని గ్రామస్థులు చెబుతున్నారు.

రోడ్డు ప్రమాదాల నివారణపై రాష్ట్ర పోలీసు శాఖ దృష్టి సారిస్తోంది. పోలీసు ఠాణాల పరిధుల్లో ఎక్కడెక్కడ తరచూ ప్రమాదాలు జరుగుతున్నాయో గుర్తించాలన్నది డీజీపీ ఆదేశించారు. భద్రాద్రి కొత్తగూడెం జిల్లాలోని చుంచుపల్లి మండలం పెనగడప వద్ద ముందస్తుగా చర్యలు చేపట్టాల్సిన అవసరాన్ని అక్కడి ప్రమాదాల తీవ్రత తెలియజేస్తోంది. గత మూడేళ్లలో ఈ గ్రామం వద్ద 29 మంది బలయ్యారు. 16 మంది తీవ్ర గాయాలపాలై ప్రాణాలతో పోరాడారు.

ఆదాయం కోసం అతివేగం

రుద్రంపూర్‌ కోల్‌హ్యాడ్లింగ్‌ ప్లాంట్‌ (ఆర్‌సీహెచ్‌పీ), సత్తుపల్లి ఉపరితల గని మార్గం మధ్యలో ఉన్న ఆనందఖని, పెనగడప, రాంపూర్‌ గ్రామాల మధ్య బొగ్గు లారీల రాకపోకలు అధికంగా ఉంటాయి. కొన్ని ప్రైవేటు బొగ్గు లారీల డ్రైవర్లకు ఒక ట్రిప్పునకు ఇంత.. అని ధరను కేటాయించడం, వారు అధిక ఆదాయం కోసం ఆరాట పడుతుండటం వల్ల ఈ మార్గంలో ప్రమాదాలు అధికంగా చోటు చేసుకుంటున్నాయి. గ్రామాల మధ్య సరైన వీధి దీపాలు కూడా లేవు.

నైపుణ్యం ఉండాలి
అంతర్గత ప్రాంతాల్లో లారీలపై విధులు నిర్వర్తించిన కొందరు డ్రైవర్లకు నేరుగా పవర్‌ స్టీరింగ్‌ వాహనాలను అప్పగిస్తున్నారు. ప్రధాన రహదారులపై అలాంటి వాహనాలను నడపడానికి పూర్తిస్థాయి అనుభవం, ఓర్పు చాలా అవసరం. పైగా వేగాన్ని నియంత్రించే నైపుణ్యం కచ్చితంగా ఉండాలి. సాంకేతికపరమైన పూర్తిస్థాయి అనుభవం కూడా తప్పనిసరి. ఇవేమీ లారీల యజమానులు పరిగణనలోకి తీసుకోవడం లేదన్న ఆరోపణలు వినిపిస్తున్నాయి.

ఎప్పుడైమవుతుందో!

ఆనందఖని జంక్షన్‌లో అత్యంత ప్రమాదకరమైన పరిస్థితులున్నాయి. గౌతంఖని ఓసీపీ నుంచి బొగ్గు లోడ్‌తో లారీలు ఆర్‌సీహెచ్‌పీ డంపింగ్‌ యార్డుకు విపరీతంగా వస్తున్నాయి. అన్‌లోడ్‌ చేసిన లారీలు సైతం వాటికి ఎదురుగా పరుగులు తీస్తున్నాయి. ‘ప్లస్‌’ ఆకారంలో ఉండే రహదారిలో నిలువుగా, అడ్డంగా వాహనదారులు, ఆర్టీసీ బస్సులు వందల సంఖ్యలో రాకపోకలు సాగిస్తున్నాయి. పల్లంగా ఉండే ఆ రహదారిలో మలుపులు ఉండటం వల్ల ఏ వాహనం ఎప్పుడు ఎదురుగా దూసుకువస్తుందో అర్థంకాని పరిస్థితి.

వేగ నియంత్రణ కరవు

పెనగడప, రాంపూర్‌ గ్రామస్థులు పలు మార్లు రహదారిపై, సింగరేణి అధికారుల కార్యాలయాలపై ఆందోళనలు చేసినా పట్టించుకునే వారు లేరు. సింగరేణి అధికారులు, పోలీసులు, జాతీయ రహదారి అధికారులు రోడ్డు ప్రమాదాల్లో లోపాలు గుర్తించి సంయుక్త ప్రణాళికతో నియంత్రణ చర్యలు తీసుకుంటేనే మృత్యుఘోష ఆగుతుంది.

• ఇదీ చూడండి : ఆగస్టు 15లోపు మధ్యమానేరుకు కాళేశ్వరం నీరు