కూతురి కోసం... ప్లాస్టిక్ సీసాల్లో వ్యవసాయం

కూతురి ఆరోగ్య పరిస్థితి మెరుగ్గా లేని సమయంలో మంచి ఆహారం అందిచాలనుకుంది ఓ తల్లి. అనుకున్నదే తడవుగా ఖాళీ ప్లాస్టిక్ డబ్బాల్లో కూరగాయలు, ఆకుకూరలు పండిస్తూ ఔరా అనిపిస్తోంది.

శీతల పానీయం తాగిన తర్వాత ఖాళీ ప్లాస్టిక్ సీసాలను చెత్తకుండీలో పడవేయడం సర్వసాధారణం. కానీ భద్రాద్రి కొత్తగూడెం జిల్లా అశ్వారావుపేటలోని సాయినగర్​కు చెందిన మెట్ట వెంకట లక్ష్మి వాటిలోనే ఆకుకూరలు, కూరగాయలు పండిస్తోంది.

సేకరించిన ప్లాస్టిక్ సీసాలను ఓవైపు కత్తిరించి మట్టి నింపి తాళ్లతో అడ్డంగా కట్టిన ఒక కర్రకు వేలాడదీస్తోంది. ఆ సీసాల్లోని మట్టిలో విత్తనాలు వేసి సేంద్రియ ఎరువులు వినియోగించి ఆకుకూరలు పెంచుతుంది. ఇలా పండించిన వాటితో ఎలాంటి ఆరోగ్య సమస్యలు ఉండవని లక్ష్మి తెలిపింది. తన కూతురు ఆరోగ్యం సరిగా ఉండకపోవడం వల్లనే ఈ విధమైన సాగు చేస్తున్నట్లు లక్ష్మి వెల్లడించారు.