టెస్ట్​ కోసం నిరీక్షించి.. క్యూలోనే ప్రాణాలొదిలి..!

భద్రాద్రి కొత్తగూడెం జిల్లా ఇల్లందు మండలం కొమరారం పీహెచ్​సీలో విషాదం చోటుచేసుకుంది. కొవిడ్ టెస్ట్ కోసం కేంద్రానికి వచ్చిన ఓ బాధితుడు.. ఒక్కసారిగా కుప్పకూలి మరణించాడు. విషయం తెలుసుకున్న సీపీఐ ఎంఎల్ న్యూ డెమోక్రసీ నాయకులు.. వైద్యుల నిర్లక్ష్యం వల్లే నిండు ప్రాణం బలైందని ఆరోపిస్తూ ఆసుపత్రి ఎదుట ఆందోళన చేపట్టారు

కొవిడ్ నిర్ధారణ పరీక్ష కోసం వచ్చి క్యూలో నిలబడ్డ ఓ వ్యక్తి.. ఒక్కసారిగా కుప్పకూలి మరణించాడు. ఈ ఘటన భద్రాద్రి కొత్తగూడెం జిల్లా ఇల్లందు మండలం కొమరారం పీహెచ్​సీలో చోటుచేసుకుంది. మృతుడి నుంచి నమూనాలు సేకరించిన వైద్య బృందం.. అతడికి కొవిడ్​ సోకినట్లు గుర్తించారు.

విషయం తెలుసుకున్న సీపీఐ ఎంఎల్ న్యూ డెమోక్రసీ నాయకులు.. ఆసుపత్రి ఎదుట ఆందోళన చేపట్టారు. టెస్ట్ కోసం.. బాధితుడు రెండు రోజులుగా హాస్పిటల్​ చుట్టూ తిరుగుతున్నా.. సిబ్బంది పట్టించుకోలేదని ఆగ్రహం వ్యక్తం చేశారు. చుట్టుపక్కల గ్రామాల నుంచి రోజు 200 మంది జనాభా వస్తుంటే.. కేవలం 25 మందికి మాత్రమే పరీక్షలు జరుపుతున్నారంటూ మండి పడ్డారు.

ఘటనపై స్పందించిన వైద్య బృందం.. ఇటీవల ఫీవర్​ సర్వే నిర్వహించినప్పుడు అనారోగ్య లక్షణాలను గుర్తించి బాధితుడికి మందులు అందజేశామని తెలిపింది. మృతుడికి షుగర్, పక్షవాతం వంటి దీర్ఘకాలిక వ్యాధులున్నాయని పేర్కొంది.

ఇదీ చదవండి:మూడోదశ కరోనాను ఎదుర్కొనేందుకు సన్నద్ధమేనా : హైకోర్టు