బుధవారం నుంచి వచ్చే నెల అయిదో తేదీ వరకు రాష్ట్రంలోని ప్రభుత్వ ఆస్పత్రులను సందర్శించాలని సీఎల్పీ నిర్ణయించింది. సీఎల్పీ నేత భట్టి విక్రమార్క నేతృత్వంలో కాంగ్రెస్‌ బృందం ఈ సందర్శన కార్యక్రమంలో పాల్గొంటుంది. ఇవాళ ఉదయం 10 గంటలకు భద్రాచలం ప్రాంతీయ ఆస్పత్రి నుంచి ప్రారంభం కానున్న ఈ కార్యక్రమం జిల్లాల వారీగా వచ్చే నెల 5వ తేదీ వరకు కొనసాగనుంది.
కరోనా విజృంభిస్తోన్న ఈ తరుణంలో అందుకు తగ్గట్లు అన్ని రకాల నిబంధనలు పాటిస్తూనే... ఈ సందర్శన కార్యక్రమం కొనసాగుతుందని భట్టి విక్రమార్క స్పష్టం చేశారు. ఆస్పత్రుల్లో రోగులకు అందుతున్న వైద్యం, అక్కడ మౌలిక వసతులు, ఇతర సౌకర్యాలను పరిశీలించనున్నట్లు తెలిపారు. ఆస్పత్రుల వారీగా క్షేత్ర స్థాయిలో సమస్యలను తెలుసుకునేందుకు ఈ సందర్శన కార్యక్రమాన్ని చేపట్టినట్లు భట్టి వివరించారు.