వర్షాలు, భారీగా వస్తున్న వరద ప్రవాహంతో భద్రాచలంలో గోదావరి ఉగ్రరూపం దాల్చింది. ప్రధాన గోదావరితో పాటు ప్రాణహిత, శబరి, సీలేరు ఉప నదుల నుంచి గోదావరికి వరద పోటెత్తింది. భారీ వర్షాలకు వరంగల్‌లో వందకుపైగా కాలనీలు, భద్రాచలంలోనూ లోతట్టు కాలనీలు నీట మునిగాయి. గోదావరి ఉగ్రరూపంతో ఆంధ్రప్రదేశ్‌లోని ఉభయ గోదావరి జిల్లాలు సైతం అతలాకుతలమయ్యాయి.
గోదావరికి 1986 ఆగస్టు 16న అత్యధికంగా వరద వచ్చింది. కేంద్ర జల సంఘం (సీడబ్ల్యూసీ) గణాంకాల ప్రకారం ఆ రోజు 30.81 లక్షల క్యూసెక్కుల వరద వచ్చింది. 1990లో 21.83 లక్షల క్యూసెక్కులు రాగా, 2006లో 18.67 లక్షల క్యూసెక్కులు వచ్చింది. ఆ తర్వాత మళ్లీ కేంద్ర జల సంఘం బులెటిన్‌ ప్రకారం సోమవారం సాయంత్రం 5 గంటలకు 18 లక్షల క్యూసెక్కుల వరద ప్రవాహం ఉంది. మంగళవారం ఉదయం 8 గంటలకు 18.71 లక్షల క్యూసెక్కులకు పెరుగుతుందని అంచనా. కేంద్ర జల సంఘం గేజ్‌ పాయింటు పోలవరం డ్యాం దిగువన మూడు కిలోమీటర్ల వద్ద ఉంది. ఈ గేజ్‌ పాయింటు ప్రకారం సోమవారం సాయంత్రం 5 గంటలకు 19.53 లక్షల క్యూసెక్కుల ప్రవాహం నమోదైనట్లు సంబంధిత ఇంజినీర్లు తెలిపారు. మంగళవారం నాటికి ఇది 21 లక్షల నుంచి 22 లక్షల క్యూసెక్కులకు పెరిగే అవకాశం ఉందని అంచనా వేశారు.