పక్బందీగా లాక్​డౌన్​ అమలు.. నిరుపేదల రేషన్​ కష్టాలు

కరోనా నివారణ చర్యల్లో భాగంగా ప్రభుత్వం ప్రకటించిన లాక్​డౌన్​ భద్రాద్రి కొత్తగూడెం జిల్లా పాలనా యంత్రాంగం పకడ్బందీ అమలు చేస్తోంది . ప్రతి ఒక్కరూ ఇంట్లోనే ఉంటూ నిత్వావసరాల కోసం మాత్రమే బయటకు రావాలని.. సామాజిక దూరం పాటించాలని అధికారులు ప్రజల్లో అవగాహన కల్పిస్తున్నారు. మరో తినడానికే పూట గడవని నిరుపేదలు మాత్రం ప్రభుత్వం ప్రకటించిన రేషన్​ తమకు ఎప్పుడందుతాయాని పడిగాపులు కాస్తున్నారు.

భద్రాద్రి కొత్తగూడెం జిల్లాలోని పలు ప్రాంతాల్లో కట్టుదిట్టమైన చర్యల నడుమ లాక్​డౌన్​ అమలు జరుగుతోంది. ఇల్లందు పట్టణంలో ఏర్పాటు చేసిన 30 పడకల ఆసుపత్రిని ఎమ్మెల్యే హరిప్రియ తనిఖీ చేశారు. ఆసుపత్రిలో లభిస్తున్న వైద్య సేవలను పరిశీలించిన ఆమె.. కరోనా వ్యాధి ప్రబలుతున్న నేపథ్యంలో వైద్యసిబ్బంది అప్రమత్తంగా ఉండాలని కోరారు. అనంతరం పట్టణంలోని పురపాలక సంఘం ఆధ్వర్యంలో చేపట్టిన పారిశుద్ధ్య కార్యకలాపాలను ఎమ్మెల్యే పరిశీలించారు.

భద్రాచలంలో పకడ్బందీగా లాక్​డౌన్​ అమలు

కరోనా నివారణ చర్యల్లో భాగంగా భద్రాచలం పోలీసులు కట్టుదిట్టమైన చర్యలు చేపడుతున్నారు. మాస్కులు లేకుండా అనవసరంగా రోడ్లపైకి వచ్చిన వాహనదారులుకు కౌన్సిలింగ్​ నిర్వహించారు. నగరంలోని కూరగాయల మార్కెట్లను మైదానంలోకి తరలించి.. మూడు అడుగుల సామాజిక దూరం ఉండేలా బాక్స్​లు గీయించారు. కూరగాయలు కొనడానికి వచ్చే వారు ఈ నిబంధనలును పాటించాలని లేని ఎడల శిక్షలు కఠినంగా ఉంటాయని హెచ్చరిస్తున్నారు.

రేషన్​ బియ్యం కోసం పడిగాపులు..

కరోనా నివారణ చర్యల్లో భాగంగా ప్రభుత్వం లాక్​డౌన్​ ప్రకటించడం వల్ల కూలీపనులు చేసుకుని జీవనం కొనసాగించే తమ పరిస్థితి తీవ్ర ఇబ్బందికరంగా ఉందని వారు వాపోతున్నారు. కొన్ని దుకాణాల్లో బియ్యం పంపిణీ జరుగుతుండగా.. మరికొన్నిచోట్ల ఇంకా పంపిణీ మొదలు కాలేదు. అధికారులను స్థానిక నాయకులను అడగ్గా ఇంకా బియ్యం సరఫరా కాలేదని సమాధానాలు వస్తున్నాయి. దానితో కూటికి గడవని నిరుపేదలు తెల్లరేషన్​కార్డులతో దుకాణాల ముందు పడిగాపులు కాస్తున్నారు.

ఇదీ చూడండి:రాష్ట్రంలో కరోనా వ్యాప్తి చెందలేదు: ఈటల