'ఆ 5 గ్రామాలు తెలంగాణలో కలపాల్సిందే..'

భద్రాద్రి జిల్లా ఏపీ-తెలంగాణ సరిహద్దు వద్ద పలు గ్రామాల ప్రజలు ఆందోళనకు దిగారు. ఆంధ్రప్రదేశ్​లో ఉన్న తమ గ్రామ పంచాయతీలను తెలంగాణలో కలపాలంటూ ధర్నా చేపట్టారు. విషయం తెలుసుకున్న ఇరు రాష్ట్రాల పోలీసులు అక్కడికి చేరుకున్నారు. ఎలాంటి అవాంఛనీయ ఘటనలు చోటుచేసుకోకుండా భారీ బందోబస్తు ఏర్పాటు చేశారు.

భద్రాద్రి కొత్తగూడెం జిల్లా ఆంధ్రప్రదేశ్​-తెలంగాణ సరిహద్దు వద్ద 5 గ్రామాల ప్రజలు ధర్నాకు దిగారు. కన్నాయిగూడెం, పిచుకలపాడు, గుండాల, పురుషోత్తపట్నం, ఏటపాక గ్రామాల ప్రజలు.. భద్రాచలం శివారులో రోడ్డుపై వాహనాలు నిలిపివేసి ఆందోళన చేపట్టారు. ఏపీలో ఉన్న తమ 5 గ్రామ పంచాయతీలను తెలంగాణలో కలపాలంటూ డిమాండ్​ చేశారు. ఆందోళనకారులకు కాంగ్రెస్​ ఎమ్మెల్యే పొదెం వీరయ్య సంఘీభావం తెలిపారు.

విషయం తెలుసుకున్న ఆంధ్రప్రదేశ్​, తెలంగాణ పోలీసులు భారీగా ఘటనా స్థలానికి చేరుకున్నారు. ఆందోళనకారులను చెదరగొట్టే ప్రయత్నం చేశారు. ఈ క్రమంలో స్వల్ప ఉద్రిక్తత చోటుచేసుకుంది. ఎలాంటి అవాంఛనీయ ఘటనలు చోటుచేసుకోకుండా పోలీసులు అక్కడే భారీగా మోహరించారు.

• ఇవీ చూడండి..ఎస్సారెస్పీ నుంచి నీటి విడుదల.. 'మంజీరా'కు పోటెత్తిన వరద