ఆదిలాబాద్‌ జిల్లా పరిశ్రమల శాఖలో ఉద్యోగుల కొరత తీవ్రంగా వేధిస్తోంది. ఒకే ఉద్యోగి సూపరింటెండ్‌గానూ... జూనియర్ అసిస్టెంట్‌గాను విధులు నిర్వహిస్తున్నారు. సూపరింటెండెంట్‌ పోస్టులో ఉండి... జూనియర్ అసిస్టెంట్‌గా పనిచేస్తున్నారంటేనే పరిస్థితి అర్థమవుతోంది. జిల్లా పరిశ్రమల కార్యాలయంలో కీలకమైన మూడు ఇండస్ట్రియల్‌ ప్రమోషన్ అధికారుల పోస్టులతోపాటు జూనియర్, సీనియర్‌ అసిస్టెంట్లు, స్టెనో, కంప్యూటర్‌ ఆపరేటర్‌ పోస్టులు ఖాళీగా ఉన్నాయి. జిల్లాల పునర్విభజన తరువాత ఈ ఖాళీలు భర్తీ కాలేదు. అన్ని విధులు తామే చేయాల్సి వస్తోందనే భావన ఉద్యోగుల్లో వ్యక్తమవుతుంటే....ఆశించిన పని కావడం లేదని నిరుద్యోగులు ఆవేదన వ్యక్తం చేస్తున్నారు.
10 పోస్టులు భర్తీకాలేదు
ఉమ్మడి ఆదిలాబాద్‌ జిల్లాలో ఆదిలాబాద్‌, ఇచ్చోడ, ఉట్నూర్‌, నిర్మల్, భైంసా, ఖానాపూర్‌, ఆసిఫాబాద్, కాగజ్‌నగర్‌, మంచిర్యాల, బెల్లంపల్లి, లక్షెట్టిపేట కేంద్రాలుగా ఇండస్ట్రియల్‌ ప్రమోషన్ అధికారుల పోస్టులు ఉండేవి. జిల్లాల పునర్విభజన తరువాత కేవలం మంచిర్యాల కేంద్రం మినహా మిగిలిన 10 పోస్టులు భర్తీ కాలేదు. గ్రామ, మండల, జిల్లా స్థాయిలో సమన్వయం చేసే విధుల నిర్వహణ అవరోధంగా మారుతోంది. స్వయం ఉపాధి కోసం వస్తున్న ఆన్‌లైన్‌ దరఖాస్తులను పరిశీలించే పరిస్థితి కనిపించడం లేదు. గ్రామ, మండల సర్వసభ్య సమావేశాల్లో పారిశ్రామికీకరణ కోసం ప్రభుత్వం కల్పిస్తున్న రాయితీ రుణాల వివరాలు తెలిపేవాళ్లు లేకుండా పోయారు. ఆ పనులు చేయాల్సిన తాము కూడా అసిస్టెంట్ల పాత్రకే పరిమితం కావాల్సి వస్తోందని వాపోతున్నారు.