ఆదిలాబాద్‌ బల్దియాలో అధికారికంగా హరితహారం కార్యక్రమాన్ని ఈ నెల 1వ తేదీన ప్రారంభించారు. ఒకేరోజున మావల నుంచి చాందా(టి) వరకు 7వేలు మొక్కలు, దుర్గానగర్‌ అర్బన్‌ పార్కులో మరో 3వేల వరకు మొక్కలు నాటారు. పురపాలకం ఆధ్వర్యంలో ఏర్పాటుచేసిన నర్సరీలో లక్ష మొక్కలు ఉండగా అటవీశాఖ ద్వారా మరో లక్ష వరకు మొక్కలు తీసుకుంటామని అధికారులు చెబుతున్నారు. కొత్తగా రెండు నర్సరీలు ఏర్పాటుచేయాలని భావించినా..ఇప్పటి వరకు పనులు మొదలు పెట్టలేదు.
ప్రభుత్వ సూచన మేరకు హైదరాబాద్ సమీపంలోని కొంపల్లి నుంచి మరో లక్షన్నర వరకు కొనుగోలు చేసి తీసుకొస్తామంటున్నారు. ఇలాగైనా మొత్తం మూడున్నర లక్షల వరకు మాత్రమే మొక్కలు అందుబాటులో ఉన్నాయి. మిగతా వాటిని జిల్లా కొనుగోలు కమిటీ సూచన మేరకు తూర్పు గోదావరి జిల్లా రాజమండ్రి నుంచి కొనుగోలు చేసి తీసుకురానున్నారు. ఇటీవల నాటిన మొక్కల్లో 7వేలు అక్కడ్నుంచే తెప్పించారు. పచ్చదనం పెంపుకోసం పురపాలక బడ్జెట్‌లో 10శాతం నిధులు కేటాయించడంతో కొనుగోలు ప్రక్రియ సులువవుతుందని అధికారులు భావిస్తున్నారు. రోడ్లపక్కన, కాలనీల్లో 5లక్షలు, ఇంటింటికి మరో 5లక్షలు పంపిణీ చేయాలని యోచిస్తున్నారు.
సవాల్‌గా మారనున్న రక్షణ
మొక్కలు నాటడమే కాకుండా వాటిని రక్షించడం అధికారులకు సవాలుగా మారనుంది. ఇది వరకు నాటిన మొక్కల్లో చాలా వాటికి రక్షణ కంచెలు బిగించకపోవడంతో పెట్టిన కొన్నాళ్లకే కనిపించకుండాపోయాయి. ప్రస్తుతం 15వేల వరకు మాత్రమే ట్రీగార్డులు తెప్పిస్తున్నారు. కానీ నాటే మొక్కల సంఖ్య మాత్రం భారీగా ఉంది. ఈ నేపథ్యంలో వాటి రక్షణ ప్రశ్నార్థకంగా మారనుంది. పురపాలక నూతన చట్టం ప్రకారం ప్రభుత్వం మొక్కల రక్షణకు అధిక ప్రాధాన్యం ఇస్తోంది. నిర్లక్ష్యం చేస్తే అధికారులతో పాటు స్థానిక కౌన్సిలర్లు కూడా ఇందుకు బాధ్యులవుతారని స్పష్టం చేసింది. ఈ నేపథ్యంలో నాటిన మొక్కలు పశువుల బారిన పడకుండా కంచె ఏర్పాటుచేయడం, ట్రీగార్డులు అమర్చడం వంటిని చేపడితేనే ప్రయోజనం ఉంటుంది.