కరోనా కోరల్లో పసిప్రాణం.. కాపాడుకునేందుకు తల్లిదండ్రుల ఆరాటం

కరోనా మహమ్మారి.. కన్నవాళ్లకు బిడ్డల్ని దూరం చేస్తోంది. అమ్మ ఒడిలో సేదతీరాల్సిన ఓ చిన్నిప్రాణం చావుబతుకుల మధ్య ఆస్పత్రిలో పోరాడుతోంది. నిన్న మొన్నటి వరకు తన బోసినవ్వుతో ఇంట్లో సందడి చేసిన ఆ బాబు.. తిరిగొస్తాడో రాడోనని ఆ కన్నతల్లి గుండె కలవరపడుతోంది. కరోనా సోకిన తొమ్మిది నెలల పసికందు చికిత్స కోసం ఉన్నదంతా అమ్మేశారు ఆ తల్లిదండ్రులు. తమ బాబు ప్రాణం నిలవాలంటే చికిత్సకు ఇంకా డబ్బు కావాలని డాక్టర్లు చెప్పగా.. బుజ్జి ప్రాణాలు కాపాడుకునేందుకు వారు ఆరాటపడుతున్నారు. ఆర్థిక సాయం కోసం ఎదురు చూస్తున్నారు.

నిన్న మొన్నటి వరకు బోసినవ్వుతో సందడి చేసిన ఆ బాబు కరోనా మహమ్మారి సోకి అమ్మ ఒడికి దూరమయ్యాడు. చావుబతుకుల మధ్య ఆస్పత్రిలో కొట్టుమిట్టాడుతున్నాడు. ఆ చిన్నారని బతికించుకోడానికి తల్లిదండ్రులు ఆపన్న హస్తం కోసం ఎదురుచూస్తున్నారు.

ఆదిలాబాద్ జిల్లా తాంసి గ్రామానికి చెందిన సంతోశ్-పౌర్ణమి దంపతుల తొమ్మిది నెలల బాబు కరోనాతో హైదరాబాద్​లోని కిమ్స్​ ఆస్పత్రిలో చికిత్స పొందుతున్నాడు. భీంపూర్ ఎంపీడీఓ కార్యాలయంలో ఒప్పంద ప్రాతిపదికన పనిచేసే సంతోశ్​ ఇటీవలే కరోనా బారిన పడ్డాడు. ఆ తర్వాత అతని భార్యకూ వైరస్ సోకింది.

వీళ్లిద్దరు కోలుకుంటున్న తరుణంలో వారి గారాలపట్టి శ్రీయశ్​ మహమ్మారి బారిన పడ్డాడు. తొలుత బాబును ఆదిలాబాద్​ రిమ్స్​లో చేర్పించారు. పరిస్థితి విషమించగా.. హైదరాబాద్​కు తరలించారు. ప్రైవేట్ ఆస్పత్రిలో రోజుకు రూ.70వేల నుంచి రూ.లక్ష వరకు ఖర్చవుతోందని.. తమ చిన్నారి ప్రాణం కాపాడటానికి సాయం చేయాలని ఆ దంపతులు కోరుతున్నారు. బాబు ప్రాణం రక్షించే దాత కోసం ఎదురుచూస్తున్నారు.

• ఇదీ చదవండి :తెలంగాణకు మరో 13,500 రెమ్‌డెసివిర్‌ ఇంజక్షన్లు