ఆదిలాబాద్ జిల్లాలో కొందరు రెవెన్యూ అధికారుల అక్రమాలు.. ఆ శాఖకే అపఖ్యాతి తెచ్చిపెడుతున్నాయి. స్థిరాస్తి వ్యాపారులు చెప్పినట్లు తలలూపే అధికారులే కాకుండా మరికొందరు సామాన్యుల బతుకులతో చెలగాటం ఆడుతున్నారు. కుటుంబ వారసుల్లో 16 మంది బతికుండగానే ఎవరూలేరని ధ్రువీకరణ పత్రం జారీ చేసి ఒక్కరికే భూమి రిజిస్ట్రేషన్ చేశారు.
అసలు ఆ భూమిపై ఎవరికి హక్కు ఉంది: బాధితుడు, తమ కుటుంబ సభ్యులు తెలిపిన వివరాల ప్రకారం.. ఆదిలాబాద్ జిల్లా బజార్‌హత్నూర్‌ మండలం టెంబి గ్రామానికి చెందిన జల్బా(76)కు బతికి ఉంటుండగానే చనిపోయినట్టు ధ్రువీకరణ పత్రం అధికారులు ఇచ్చారు. జల్భా తాత సంత్యా. ఆయన పేరిట టెంబిలో 25 ఎకరాల లావనీ భూమి ఉంది. సంత్యా సహా ఆయన ముగ్గురు కొడుకులు దశాబ్ధాల క్రితం కాలం చేశారు. ఆ ముగ్గురి సంతానంలో పెద్దాయన జల్భా సహా 16 మంది వారసులకు 25 ఎకరాలపై హక్కు ఉంది.
అవినీతికి పాల్పడిన రెవెన్యూ సిబ్బంది:కాసులకు కక్కుర్తిపడిన రెవెన్యూ సిబ్బంది 16 మంది సమ్మతి తీసుకోకుండానే కేవలం ఒక్కరి పేరిట 6.17 ఎకరాలు రిజిస్ట్రేషన్ చేశారు. పైగా వారుసుల్లో ఒక్కరే బతికి ఉన్నట్లు గతేడాది జులై 29న ధ్రువీకరణ పత్రం జారీ చేసిన విషయంలో వెలుగులోకి వచ్చింది. ఇదేంటని ప్రశ్నిస్తే అధికారులు బెదిరించారని వారసులు వాపోతున్నారు.