జొన్నల కొనుగోళ్లు చేపట్టాలని భాజపా నేతల ధర్నా

రైతులు పండించిన జొన్న పంటను ప్రభుత్వం కొనుగోలు చేయాలంటూ ఆదిలాబాద్​ జిల్లా కేంద్రంలో భాజపా నేతలు ధర్నా చేపట్టారు. ఖరీఫ్​ సమయం దగ్గర పడుతుండటంతో కొనుగోళ్లు చేపట్టాలని ఆ పార్టీ జిల్లా అధ్యక్షుడు పాయల్​ శంకర్ డిమాండ్​ చేశారు. ఆందోళనను పోలీసులు అడ్డుకోవడంతో అక్కడ స్వల్ప ఉద్రిక్తత ఏర్పడింది.

ఆదిలాబాద్‌ జిల్లాలో రైతులు పండించిన జొన్న పంటను ప్రభుత్వం కొనుగోలు చేయాలంటూ భాజపా ధర్నా చేపట్టింది. కొవిడ్‌ నిబంధనలకు లోబడి కొందరు జొన్న రైతులతో కలిసి ఆ పార్టీ జిల్లా అధ్యక్షుడు పాయల్‌ శంకర్‌.. తన ఇంటివద్దనే ఆందోళన చేపట్టారు. జిల్లాలో 80వేల ఎకరాల్లో రైతులు జొన్నలు సాగు చేశారని శంకర్​ తెలిపారు. కొనుగోళ్లకు ప్రభుత్వం చొరవ చూపకపోవడంతో.. చేతికొచ్చిన 4లక్షల క్వింటాళ్ల జొన్నలను రైతులు ఇంటివద్దనే ఉంచుకోవాల్సిన దుస్థితి ఏర్పడిందని ఆవేదన వ్యక్తం చేశారు.

ఖరీఫ్‌ సమయం దగ్గరపడుతున్నప్పటికీ ప్రభుత్వం స్పందించకపోవడంతోనే ఆందోళన చేయాల్సి వస్తోందని పాయల్​ శంకర్​ పేర్కొన్నారు. ఇప్పటికీ కొనుగోళ్లకు ముందుకు రాకపోతే ఆందోళనలు ఉద్ధృతం చేస్తామని హెచ్చరించారు. ఆందోళనను పోలీసుల అడ్డుకోగా ఇరు వర్గాల మధ్య వాగ్వాదం చోటుచేసుకుంది. రైతులకు న్యాయం చేయకపోతే పోలీసులు అడ్డుకున్నా రోడ్ల పైకి వచ్చి నిరసన చేపడతామని హెచ్చరించారు.

ఇదీ చదవండి:నిబంధనలు కఠినంగా పాటించి కరోనాపై విజయం సాధించాలి: సీపీ