ఉట్నూర్​లో కరోనా కలకలం.. బాలింతకు పాజిటివ్..

ఆదిలాబాద్​ జిల్లా ఉట్నూర్​ ఏజెన్సీ ప్రాంతంలో కరోనా మహమ్మారి రోజురోజుకు దడ పుట్టిస్తుంది. గత 15 రోజుల నుంచి 9 కేసులు పాజిటివ్ కేసులు నమోదు కావటం వల్ల ప్రజలు భయభ్రాంతులకు గురవుతున్నారు. తాజాగా ఓ బాలింతకు కరోనా పాజిటివ్ వచ్చింది.

ఆదిలాబాద్​ జిల్లా ఉట్నూర్ మండల కేంద్రంలోని హనుమాన్​నగర్​కు చెందిన ఓ బాలింత మహిళకు కరోనా పాజిటివ్ వచ్చినట్లు అదనపు జిల్లా వైద్యాధికారి తెలిపారు. ఈ నెల 13న ఆమెకు శ్వాస తీసుకోవడం ఇబ్బందిగా ఉండటం వల్ల హైదరాబాద్​లోని గాంధీ ఆసుపత్రికి తరలించినట్లు తెలిపారు.

అక్కడ వైద్యులు వైద్య పరీక్షలు నిర్వహించి... ఆమెకు కరోనా పాజిటివ్ ఉందని నిర్ధరించినట్లు వెల్లడించారు. వెంటనే వైద్య సిబ్బంది రోగి ఇంటి వద్దకు చేరుకొని సర్వే ప్రారంభించినట్లు వైద్యురాలు డాక్టర్ అనురాధ తెలిపారు.