ఆదిలాబాద్‌ జిల్లాలో కరోనా వైరస్ మృత్యుఘంటికలు మోగిస్తోంది. రిమ్స్‌ ఆసుపత్రిలోని కొవిడ్‌ వార్డు రోగుల ఆర్తనాదాల కేంద్రంగా మారుతోంది. వ్యాధిగ్రస్థుల ప్రాణాలకు భరోసా ఇవ్వలేకపోతోంది. ఓవైపు ఇంజక్షన్ల కృత్రిమ కొరత, మరోవైపు మౌలిక వసతుల కల్పన లేకపోవడంతో వైరస్ బాధితులతో పాటు వైద్యులు, వైద్య సిబ్బంది ప్రాణాలకూ పరీక్షగా మారింది. రిమ్స్‌లో గత ఏడాది జులై 30న తొలి కరోనా మరణం చోటుచేసుకుంది. అప్పటి నుంచి నేటి వరకు 114 మంది మరణించడం వ్యాధి తీవ్రతను వెల్లడిస్తోంది.
రిమ్స్‌ ఆసుపత్రిలో కరోనా చికిత్స కోసం గతేడాది ప్రభుత్వం మూడు వార్డులను ఏర్పాటు చేసింది. ఇందులో కరోనా అనుమానితులను ఉంచడానికి ఒక వార్డు, వ్యాధి సోకిన వారికోసం మరో వార్డు, అత్యవసరంగా ఆక్సిజన్‌, వెంటిలేటర్‌ అందించే వారికోసం మరో వార్డు ఏర్పాటు చేసింది. ఈ వార్డుల పర్యవేక్షణ కోసం ప్రత్యేకంగా 157 మంది వైద్య సిబ్బందిని నియమించారు. కానీ ఈ ఏడాది బాధితులందరినీ ఒకే వార్డులో ఉంచుతున్నారు. ఓ పది మంది వైద్య సిబ్బంది పర్యవేక్షణలోనే రోగుల బాగోగులను చూడటంతో సమస్య ఉత్పన్నమవుతోంది. ఇది చాలదన్నట్లుగా అత్యవసరమైన రోగులకు సైతం రెమ్‌డెసివిర్‌ ఇంజక్షన్లు, వైద్యులు, వైద్య సిబ్బందికి అవసరమైన పీపీఈ కిట్లు, గ్లౌజుల పంపిణీ జరగడం లేదు. ఫలితంగా కొవిడ్‌ విధుల నిర్వహణ అంటేనే వైద్యులు, వైద్య సిబ్బందిలో వణుకుపుడుతోంది.