Adilabad ZP Meeting: ఆదిలాబాద్ జిల్లాలో అధికార పార్టీ నాయకుల మధ్య విభేదాలు ఒక్కసారిగా బయటకొచ్చాయి. జడ్పీ ఛైర్మన్‌ జనార్దన్‌ రాఠోడ్‌ అధ్యక్షతన జరిగిన సర్వసభ్యసమావేశంలో ప్రజాప్రతినిధులు అధికారులే లక్ష్యంగా విమర్శలు చేశారు. సమావేశం ప్రారంభంలోనే బోథ్‌ ఎమ్మెల్యే రాఠోడ్‌ బాపురావు ఉపాధిహామీ అవకతవకలపై నివేదిక ఇవ్వడంలో కలెక్టర్‌ తాత్సారం చేస్తున్నారంటూ ఆరోపించారు. సమాచారం అడిగినా ఇవ్వడం లేదంటూ సభను వాకౌట్‌ చేశారు. అదే సభలో ఉన్న ఎమ్మెల్యే జోగు రామన్న నచ్చ జెప్పినా ఆయన వినిపించుకోకుండా వెళ్లిపోయారు.
ఎంపీడీవోపై అకారణంగా వేటు వేశారని బోథ్‌ మండల ఎంపీపీ తుల శ్రీనివాస్‌ ఆరోపించారు. ఎవరి ఒత్తిళ్లకు తలొగ్గి సస్పెన్షన్‌ చేశారని పరోక్షంగా అధికార పార్టీ ఎమ్మెల్యే తీరును ఎండగట్టారు. ఎంపీడీవో సస్పెన్షన్‌ను ఎత్తివేయాలని ఎంపీపీ పట్టుబట్టారు. ఈ విషయంలో కలెక్టర్‌ సమాధానం ఇస్తూ పూర్తి విచారణ తర్వాతే చర్యలు తీసుకున్నామని తెలిపారు. దీంతో ఎంపీపీ ఆ సమాధానానికి సంతృప్తి చెందకుండా తొలుత పోడియం వద్ద బైఠాయించి ఆ తర్వాత సమావేశం నుంచి వాకౌట్‌ చేశారు. బోథ్‌లో జరిగిన సామాజిక తనిఖీల విషయాన్ని ప్రస్తావిస్తూ మరుగుదొడ్ల వినియోగంపై కేంద్ర బృందం వచ్చి విచారణ చేసిందని డీఆర్‌డీవో కిషన్‌ పేర్కొన్నారు. కేంద్ర బృందం వచ్చి చెబితేగానీ అధికారులు తేరుకోవడం లేదని ఎమ్మెల్యే జోగు రామన్న విమర్శించారు. అసలు జిల్లా అధికారులు పని చేస్తున్నారా లేదా అని ఆయన అసంతృప్తి వ్యక్తం చేశారు.